नवदुर्गा द्यःछेँ नकिंया विवाद ज्यन

ख्वप (नेपालभाषा टाइम्स)÷थनया नवदुर्गा जात्रा र प्याखं सञ्चालनय् पिहां वःगु समस्या समाधान जूगु दु । थन नवदुर्गा द्यःछेँया नकिं ल्ययेगु ज्याय् पिहां वःगु विवादं यानाः जात्रा समेत अन्यौलय् लाःगु खः ।

विवाद ज्यंकेत जूगु खँल्हाबल्हा लिपा आः नवदुर्गा द्यःछेँया नकिं पदय् इन्दिरा वनमाला नियुक्त जुयादीगु दुसा वहे नकिं पदय् दावी यानादीम्ह हरिगोविन्द वनमालाया छेँजःयात मेगु न्यादँ लिपा पाः बीगु सहमति जूगु खँ ख्वप नपा ९ वडाया वडाध्यक्ष रवीन्द्र ज्याख्वं कनादिल । मंगलवाः जात्रालिसे सम्बन्धित थीथी खलः पुचः लिसें स्थानीय जनप्रतिनिधिपिनि दथुइ जूगु खँल्हाबल्हां थ्व सहमति जूगु खः ।

आः जात्रा न्ह्याकेत क्षमापूजा यायेगु व जात्राया सकतां विधिविधान याकनं हे न्ह्याकेगु सहमति नं जूगु दु । सहमति कथं इन्दिरा वनमालां उच्च अदालत यलय् दायर यानातःगु रिट लित कायेगु लागिं हरिगोविन्द वनमालाया सहमतिइ मङ्गलवाः हे निवेदन नं बियादीगु दु ।