बुसादँया लसताय् देय् दबूया येँ जिल्ला कमिटिया अन्तरक्रिया

येँ- नेवाःतय्गु राष्ट्रिय संगठन नेवाः देय् दबूया नीखुक्वःगु बुसादँया लसताय् दबूया येँ जिल्ला कमिटिं शनिवाः जूमपाखें भिंतुना कालबिल व अन्तरक्रिया ज्याझ्वः याःगु दु ।

मचाराजा महर्जनया नायःसुइ जूगु ज्याझ्वलय् दबूया नायः नरेश ताम्राकार मूपाहां कथं झायादीगु खः । अथेहे दबूया मिसा कवःया नायः रश्मिला प्रजापति, येँ जिल्लाया निवर्तमान नायः नापं नेवाः देय् दबूया सचिवालय मूदुजः न्हुच्छे काजि महर्जन, दबूया बागमती प्रदेशया कजि उमेश स्थापित, ज्यापु महागुथिया नायः राजभाइ जकःमि, शान्तवीर सिंह तुलाधरपिन्सं भिन्तुना बियादीगु खः ।

नेवाः तय्गु हक अधिकार, जग्गा जमीन, गुथि, संस्कृति, परम्परा यात सुरक्षित यायेगु खःसा दबूपाखें थाय् थासय् कचा दयेका व्यवस्थित ढंगं संगठित यायेमाःगु खँय् ब्वति काःपिंसं बः बिउगु खः । ज्याझ्वलय् थीथी व्यक्तिपिंसं साङ्गीतिक ब्वज्यानं न्ह्यब्वयादीगु दु ।