लानिपुखू पुनर्निर्माण जेठ १ गतेनिसें न्ह्याइगु

येँ – लानिपुखू दयेकेगु ज्या वइगु जेठ १ गते निसें न्ह्याकीगु जूगु दु । लानिपुखू गुकथं दयेकेगु धयागु बारे विवाद ब्वलनाः छुं ई न्ह्यवंनिसें ज्या दिनाच्वंगु खःसा आः लानिपुखू पुनःनिर्माणया निंतिं हयातःगु आधुनिक निर्माण सामान वैशाख मसान्त तकया दुने चीकाः जेठ १ गते निसें
दयेकेगु तयारी याःगु खः ।

येँ महानगरपालिकाया सूचना अधिकारी बसन्त आचार्यं धयादीगु दु, ‘वइगु छुं न्हि दुने हे पुनःनिर्माणया निंतिं धकाः हयातःगु आधुनिक सामान चीकेगु जुइ व जेठ १ गते निसें दयेकेगु ज्या न्ह्याकेगु जुइ ।’

लानिपुखूयात परम्परागत शैलीं हे दयेकेमाःगु माग तच्वयेवं आः पुनःनिर्माणय् छ्यलेगु निंतिं हयातःगु आधुनिक सामान चीकेत्यंगु खः ।
सम्पदाह्यमितय्सं लानिपुखूयात पुलांगु हे शैलीं दयेकेमाः धकाः दबाब बियाच्वंगुलिं वंगु स्वला न्ह्यवंनिसें थनया ज्या दिनाच्वंगु खः ।

लानिपुखूयात परम्परागत शैलीं हे दयेकेगु निंतिं वंगु चैत २२ गते निर्णय जूगु खः । संस्कृति, पर्यटन तथा नागरिक उड्डयनमन्त्री रविन्द्र अधिकारी,
येँ महानगरपालिकाया मेयर विद्यासुन्दर शाक्य व पुरातत्व विभागया महानिर्देशक भेषनारायण दाहाल दथुइ चैत २२ गते जूगु बैठकं लानिपुखू दुने च्वंगु आधुनिक सामान चीकेगु निर्णय याःगु खः ।

लानिपुखू गथे यानाः दयेकेगु धयागु बारे प्रतिवेदन बीत दयेकूगु विज्ञ पुचलं नं परम्परागत शैलीं हे दयेकेमाःगु सुझाव बिउगु खः । पुखूया दथुइ च्वंगु बालगोपालेश्वर देगः पुरातत्व विभागं दयेकाच्वंगु खःसा लानिपुखूयात येँ महानगरपालिकां दयेकाच्वंगु खः । बालगोपालेश्वर देगः नं पुलांगु हे शैलीं दयेकीगु जूगु दु ।