देय्या सुरक्षाय् हाथ्या वयेफुगु सेनाया दावी

येँ- नेपाली सेनाया प्रधानसेनापति पूर्णचन्द्र थापां देशय् थौंकन्हय् ब्वलनाच्वंगु राजनीतिक अन्यौलं यानाः सुरक्षाय् हाथ्या वयेफुगु खँ धयादीगु दु । थःगु कार्यकाल क्वचायेत स्वला ल्यं दनिगु इलय् सञ्चार माध्यमतलिसे खँ ल्हासें प्रधानसेनापति थापां थ्व खँ धयादीगु खः ।

देशय् विकसित राजनीतिक घटनाक्रमयात सेनां सतिक च्वनाः स्वयाच्वंगु दु धासें वय्कलं नेपाली सेना संविधानं थःत बियातःगु दायरा स्वयां पिहां धाःसा मवनीगु खँ नं कनादिल । अथे खःसां शान्ति सुरक्षाय् छुं कथंया संकट वल धाःसा संविधानं बियातःगु दायराया दुने च्वनाः सेनां थःगु कर्तव्य पूवंकीगु खँ नं वय्कलं धयादिल ।

सेना दुने कार्यकाल सिधइगु लछि दुने नेतृत्व हस्तान्तरण याइगु चलन दुसां थम्हं स्वला न्ह्यवंनिसें हे नेतृत्व हस्तान्तरणया प्रक्रिया शुरु यानागु खँ नं वय्कलं कनादिल । नेपाली सेना दुने वय्कः धुंकाः रथी प्रभुराम शर्मा थापा न्हूम्ह प्रधानसेनापति जुयादी ।