नेपाल व भट्टराईबारे कात्तिक १५य् फैसला

येँ – ललिता निवास जग्गा काण्डय् पुलांपिं प्रधानमन्त्री माधव नेपाल व डा. बाबुराम भट्टराईविरुद्ध मुद्दा मन्ह्याकेगु अख्तियार दुरुपयोग अनुसन्धान आयोगया निर्णय विरुद्ध लाःगु रिटय् सर्वोच्च अदालतं वइगु कार्तिक १५ गते फैसला न्यंकीगु जूगु दु । सोमवाः च्वंगु प्रधानन्यायाधीश चोलेन्द्र शम्शेर जबरा व न्यायाधीश नहकुल सुवेदीया मंकाः इजलासं निर्णय न्यंकेगु तिथि क्वःछिउगु खः ।

नेता नेपाल व भट्टराई प्रधानमन्त्री जुयाच्वंगु इलय् मन्त्रिपरिषदं येँया बालुवाटारय् च्वंगु ललिता निवासया सरकारी जग्गा व्यक्तिया नामय् हयेगु कथं निर्णय याःगु खः । ललिता निवासया जग्गा सम्बन्धी तत्कालिन प्रधानमन्त्री नेपालया मन्त्रिपरिषदं निगू व भट्टराईया मन्त्रिपरिषद्ं छगू निर्णय याःगु खः । थ्व हे निर्णयया आधारय् सरकारी जग्गा व्यक्तिया नामय् दर्ता याःगु खः ।

तर मन्त्रिपरिषदं याःगु निर्णय नीतिगत धासें अख्तियारं पुलांपिं प्रधानमन्त्री विरुद्धया भ्रष्टाचार मुद्दा मन्ह्याकूगु खः । अख्तियारं मन्त्रिपरिषद्या निर्णय आयोगया क्षेत्राधिकारय् मलाः धासें नेपाल व भट्टराईविरुद्ध मुद्दा दायर मयाःगु खः ।

थ्व प्रकरणय् तत्कालीन मन्त्री विजयकुमार गच्छदार, चन्द्रदेव जोशी, तत्कालीन सचिवपिं दीप बस्न्यात, दिनेश अधिकारी सहित १७५ म्ह विरुद्ध अख्तियारं विशेष अदालतय् भ्रष्टाचारया मुद्दा दायर याःगु खः ।

पुलांपिं प्रधानमन्त्रीयात भ्रष्टाचार मुद्दा मतयेगु अख्तियारया निर्णय कानुन अःखः जूगु धासें वरिष्ठ अधिवक्ता बालकृष्ण न्यौपानें सर्वोच्च अदालतय् रिट दायर याःगु खः ।