कमेडियन सिंहयात कारवाही न्ह्याकेगु निंतिं जाहेरी बीगु तयारी

येँ (नेपालभाषा टाइम्स)- नेवाः समुदाययात अपमान यानाः कमेडी क्यंम्ह कमेडियन अपूर्व क्षितिज सिंह विरुद्ध कानुनी कारवाही न्ह्याकेगु तयारी जुयाच्वंगु दु । कमेडी क्याफे नांगु ज्याझ्वलय् नेवाः समुदायया अपमान जुइकथं स्टायण्ड अप कमेडी क्यंम्ह सिंहयात प्रहरीं ज्वनेधुंकूगु दु । आः वयाविरुद्ध कानुनी कारवाही न्ह्याकेगु निंतिं नेवाः समुदायपाखें जाहेरी बीगु तयारी जुयाच्वंगु नेवाः अभियन्ता सुमन साय्मिं कनादीगु दु ।

कमेडी क्याफेय् सिंहया प्रस्तुति पिहां वयेवं शनिवाः हे नेवाः अभियान्ततय्सं येँ महानगरीय प्रहरी परिसर टेकुइ वनाः वयात ज्वनेत निवेदन बिउगु खः । प्रहरीइ निवेदन बिइवं सिंहं सामाजिक सञ्जालपाखें माफी फ्वंगु खः । तर माफी फ्वंसां नेवाः समुदाययात बांमलाक अपमान याःगुलिं माफी बिइगु मखु, कारवाही न्ह्याकेमाःगु सः सामाजिक सञ्जालय् थ्वयाच्वंगु खः । आः वया विरुद्ध कानुनी कारवाही हे न्ह्याकेगु कथं न्ह्याः वनाच्वनागु खँ भाजु साय्मिं कनादीगु दु ।

सिंहयात कारवाही न्ह्याकेगु निंतिं जाहेरी बिइत थौं नं नेवाः अभियन्तात महानगरीय प्रहरी परिसर टेकुइ मुनाच्वंगु दु । आः वयाविरुद्ध जातीय विखण्डन हयेत स्वःगु, साइबर क्राइम मुद्दाय् जाहेरी बीगु निंतिं वकिलत लिसे सहलह जुयाच्वंगु खँ नं भाजु साय्मिं कनादीगु दु । जाहेरी बीधुंकाः जक वयाविरुद्ध अदालतय् म्याद थप यानाः प्रहरीं कारवाही न्ह्याकीगु खँ धाःगु दु ।

सम्बन्धित बुखँ

LEAVE YOUR COMMENTS