चीनं सीमा अतिक्रमण मयानागु दाबी

येँ (नेपालभाषा टाइम्स) – चीनं हुम्लाय् नेपाःया सीमा अतिक्रमण याःगु धइगु समाचार हावादारी जूगु दाबी याःगु दु । चिनियाँ विदेश मन्त्रालयया प्रवक्ता वाब वनेबिनं मंगलवाः ग्वसाः ग्वःगु प्रेस ब्रिफिङय् हुम्लाया लिमी उपत्यकाय् १ सय ५० हेक्टर जमिन अतिक्रमण याःगु धइगु समाचार झूठ, तथ्यय् आधरित मजूगु व हावादारी जूगु खँ धाःगु खः ।

वंगु महिनाय् हुम्लाया नाम्खा गाउँपालिका-६ सं चीनं नेपाःया भूमिइ छेँय् दयेकेगु व सीमा क्षेत्रया ११ नम्बर पिलर हे तंगु धकाः समाचार वःगु खः । म्हिगःया प्रेस ब्रिफिङय् प्रवक्ता वनेबिनं धयादी, ‘चीनं नेपाःया भूमि अतिक्रमण यात धइगु खँ हावादारी खः, सुनां उगु समाचार च्वल उमिसं हे उकिया प्रमाण बीमाः, समाचार च्वये न्ह्यः स्रोत लिसे प्रमाणित यायेत जिं सुझाव बियाच्वना, हाकनं नं जिं धयाच्वना सीमा अतिक्रमण यात धइगु समाचार झूट खः ।’