प्रधानन्यायाधीशं राजीनामा हे बीमाःगु निष्कर्ष
येँ – नेपाल बार एसोसिएसनया पदाधिकारीया बैठकं प्रधानन्यायाधीश चोलेन्द्र शम्शेर जबरां राजीनामा बीमाःगु निष्कर्ष पिकाःगु दु ।
म्हिगः च्वंगु बारया बैठकय् न्यायपालिकाया गरिमा ल्यंकेत प्रधानन्यायाधीशं निकास बीमाःगु निष्कर्ष पिकाःगु खः ।
बारया अध्यक्ष चण्डेश्वर श्रेष्ठया कथं प्रधान– न्यायाधीशं राजीनामा बियाः निकास बीमाःगु निष्कर्ष पिकाःगु खँ धयादीगु दु । बारया पदाधिकारी बैठकं प्रधानन्यायाधीशं राजीनामा बिउगुसा जक न्यायालयया गतिरोध अन्त्य जुइगु सुझाव बिउगु खः । प्रधानन्यायाधीशया राजीनामायात कयाः बारं थौं सल्लाहकार समितिया बैठक नं सःताः औपचारिक धारण सार्वजनिक यायेगु तयारी यानाच्वंगु दु ।
थ्व स्वयां न्ह्यः बारं वंगु आइतवाः जक प्रधानन्यायाधीशयात नापलानाः म्हिगः फुलकोर्टया बैठक तयेत माग याःगु खः । बारया माग बमोजिम प्रधानन्यायाधीश जबरां म्हिगः फुलकोर्टया बैठक सःतूगु खःसां नं सर्वोच्चया झिंस्वम्हं न्यायाधीशपिंसं उगु फुलकोर्ट बैठकयात बहिष्कार याःगु खः ।
म्हिगः न्यायाधीशपिनिगु बैठकं अदालत दुने खने दुगु विचलन व प्रधानन्यायाधीशया भूमिकायात कयाः समिक्षा याःगु खः । न्यायाधीशपिनिगु म्हिगःया बैठकं थौं प्रधानन्यायाधीश जबरायात नापलानाः मंकाः खँ तयेगु निर्णय नं याःगु खः ।
न्यायाधीशपिं फुक्कं थःगु बैठकय् केन्द्रित जुइवं म्हिगः सर्वोच्च अदालतया फुक्कं इजलास नं प्रभावित जूगु दु । म्हिगः सर्वोच्चय् पेसी तयातःगु खःसां नं इजलास च्वने मफुगु खः। म्हिगः झिगू इजलास क्वःछिनातःगु खःसा इजलासय् मुद्दायात कयाः सुनुवाई धाःसा मजुल । म्हिगः इजलास मच्वंगुयात विश्लेषकतय्सं इजलास बहिष्कार कथं कायेगु यानाच्वंगु दु ।
न्यायपालिकाय् खनेदुगु विकृति, विसंगति अन्त्य याये मफुगु धासें पुलांपिं न्यायाधीशपिनिगु फोरमं प्रधानन्यायाधीशं निकास बीमाःगु व मखुसा प्रतिनिधिसभां थःगु संवैधानिक दायित्व पूवंकेमाःगु खँ धाःगु खः ।
उकथं हे न्यायपालिका शुद्धीकरण अभियानय् दुपिं वरिष्ठ कानुन व्यवसायीपिंसं नं प्रधानन्यायाधीश जबरां राजीनामा बीमाःगु खँ धायेगु यानाच्वंगु दु । अथे हे वरिष्ठ अधिवक्तापिं रमणकुमार श्रेष्ठ, कृष्णप्रसाद भण्डारी, मुक्ति प्रधान व सुरेन्द्रकुमार महतों न्यायालययात विवादय् हयेगु ज्या याःगुलिं प्रधानन्यायाधीश जबरां राजीनामा बीमाःगु माग यानादीगु दु ।
LEAVE YOUR COMMENTS