ने. सं. ११४४ कौलाथ्व दुतिया -

छेँ जग्गा व्यवसायया मनोबल थकायेत नीतिगत दर म्हो यानागु खः– गभर्नर अधिकारी

येँ (रासस)- नेपाल राष्ट्र बैंकया गभर्नर महाप्रसाद अधिकारीं अर्थतन्त्रया समग्र स्थितिया स्पष्ट आत्मसमिक्षा सहित चालु आर्थिक दँया मौद्रिक नीति वःगु खँ धयादीगु दु । विश्वया फुक्क धयाथें देय्या केन्द्रीय बैंकतय्सं कडा नीति नालाच्वंगु अवस्थाय् नेपाल राष्ट्र बैंकं धाःसा नीतिगत दर म्हो यानाः ‘लचिलो’ नीति नालागु खँ वय्कलं धयादीगु दु ।

मौद्रिक नीतियात कयाः येँय् जूगु छगू सहलह ज्याझ्वलय् न्ववासें गभर्नर अधिकारीं ‘लचिलो’ आर्थिक नीति नालेमाःगु तर्कसंगत आधार नं दुगु खँ धयादीगु खः । ‘७ प्रतिशत नीतिगत दरयात साढे ६ प्रतिशत यानागु दु । थथे ‘लचिलो’ नीति नालेमाःगुया लिउन छुं आधार दु । आः बाह्य क्षेत्रयात सहज जूगु दु । वर्षान्तय् तरलता नं सहज खनेदुगुलिं राष्ट्र बैंकं नीतिगत दर म्हो याःगु खः । अथेहे छेँ –जग्गा व्यवसायय् मनोबल कुहां वनाच्वंगुलिं उकियात थकायेत नं राष्ट्र बैंकं नीतिगत दर म्हो याःगु खः’ वय्कलं धयादीगु दु ।

अथेहे चालु आर्थिक दँया निंतिं हःगु मौद्रिक नीतिइ बैंक व वित्तीय संस्थापाखें निजी ख्यःयात वनीगु त्यासा वृद्धिदर ११.५ प्रतिशत, ६ प्रतिशतया आर्थिक वृद्धिदर व मूल्यवृद्धि साढे ६ प्रतिशतय् सीमित यायेगु लक्ष्य प्राप्त यायेगु कथं मौद्रिक नीति वःगु दावी नं वय्कःया दु ।

चालु आर्थिक दँय् ५ खर्ब ६२ अर्ब तका बराबरया त्यासा प्रवाह जुइगु लक्ष्य तयातःगु दु । थ्व लक्ष्य महत्वाकांक्षी मखसे मौद्रिक सूचकतय् विश्लेषण यानाः क्वःछिनागु खँ नं गभर्नर अधिकारी धयादीगु दु । ‘तरलताय् वःगु सुधार, ब्याजदर म्हो जुया वंगु, रेमिट्यान्स अप्वया वःगु, सरकारी बजेट खर्चया अवस्था सुधार यायेगु निंतिं हःगु कार्यक्रम आदियात स्वयां त्यासाया वृद्धिदर प्रक्षेपण यानागु खः’ वय्कलं धयादीगु दु ।

वंगु आर्थिक दँय् धाःसा निजी क्षेत्रयात वनीगु त्यासाया वृद्धिदर १२.५ प्रतिशत प्रक्षेपण यानातःगु खःसा मुक्कं ३ प्रतिशत जक वृद्धि जूगु खः । सरकारं धाःकथं पुँजीगत खर्च यायेमफुगु, आर्थिक वृद्धिदर म्हो जूगु व तरलताय् वःगु संकुचनया कारणं उबलय् त्यासा विस्तार जुइमफुगु खँ राष्ट्र बैंकं धया वयाच्वंगु दु ।

ज्याझ्वलय् न्ववासें सुदूरपश्चिम प्रदेशया पुलांम्ह आर्थिम मामिलामन्त्री झपट बाहेरां थौंकन्हय् बैंक व वित्तीय संस्थातय्सं आयात व व्यापारय् जक त्यासा अप्वयेकाच्वंगुलिं हरेक प्रदेशय् पूर्वाधार बैंक चायेकेगु नीति हयेमाःगु खँ धयादीगु खः ।

नेपाल बैंकर्स संघया अध्यक्ष सुनिल केसीं चालू आर्थिक दँया निंतिं न्यागू खर्ब ६२ अर्ब बराबरया त्यासा विस्तार उत्पादनशील, चीधंगु व ‘मझौला’ उद्योगय् यंकेफत धाःसा उकिं अर्थतन्त्त सुधारय् योगदान बीगु खँ धयादिल । ब्याज दर करिडोरयात प्रभावकारी दयेकेत ब्याज दरया क्वय्या सीमाय् स्थायी निक्षेप संकलन सुविधा उपलब्ध याकेगु कथं हःगु न्हूगु व्यवस्था सकारात्मक जूगु खँ वय्कलं धयादिल ।

पुुलांम्ह बैंकर अनलराज भट्टराईं साढे ११ प्रतिशतया त्यासा वृद्धिदर महत्वाकांक्षी जूगु खँ धयादीगु दु । ‘चालु आर्थिक दँया त्यासा वृद्धिदर ५.९१ प्रतिशतं अप्वः थहां वनेफइमखु । आःया तरलताया अवस्थां साढे ११ प्रतिशत थ्यंके हे फइमखु’ वय्कलं धयादीगु दु । चालु आर्थिक दँय् सरकारं हःगु आर्थिक वृद्धिदरया लक्ष्य नं चुलाइगु खँय् शंका दुगु वय्कःया धापू दु ।

नेपाल राष्ट्र बैंकया कार्यकारी निर्देशक प्रकाश श्रेष्ठं त्यासा वृद्धिदर मिले मजूगु थें तायेफु, तर थःपिंसं आशावादी जुयाः हे थ्व दर कायम यानागु धासें धाःगु दु, ‘त्यासाया वृद्धिदर हासिल यायेत श्रोत गाइमखु ला धयाथें च्वनेफु, तर सरकारं थःगु पुँजीगत खर्च लक्ष्य कथं हे याइगु वउकिं बजाःयात चलायमान यानाः त्यासाया माग अप्वयेकेफु धयागु विश्वास राष्ट्र बैंकया दु ।’