राष्ट्र बैंकपाखें सेवा शुल्कय् कडाइ
येँ – नेपाल राष्ट्र बैंकं त्यासा बीगु लिसें थीथी सुविधाय् काइगु सेवा शुल्क अप्वः मकायेत बैंक व वित्तीय संस्थातय्त निर्देशन बिउगु दु । केन्द्रीय बैकं वित्तीय संस्थातय्सं अप्वः सेवा शुल्क कयाच्वंगुलिं आवंलिं कडा निगरानी यायेगु खँ धाःगु दु । त्यासा बीबलय् प्रशासनिक सेवा शुल्क, अग्रिम भुक्तानी, प्रतिबद्धता शुल्क धकाः थीथी शीर्षक थीथी कथं सेवा शुल्क कयाच्वंगुलिं केन्द्रीय बैंकं थज्याःगु शुल्कय् कडाइ यायेत्यंगु खः ।
थांैकन्हय् बैंक व वित्तीय संस्थातय्सं १.५ प्रतिशत तक सेवा शुल्क कयाच्वंगु दु । थुकियात कयाः उद्योगी व्यवसायीतय्सं ताःई न्ह्यव निसें विरोध याना वयाच्वंगु खः । उद्योगी व्यवसायीतय्सं थुकियात कयाः राष्ट्र बैंकया गभर्नर चिरञ्जिवी नेपालया नं ध्यानाकर्षण यायेधुंकूगु दु ।
राष्ट्र बैंकं सेवा शुल्कया रुपय् ०.२५ प्रतिशत जक कायेदइगु खँ धाःगु दु ।
तर बैंक व वित्तीय संस्थातय्सं धाःसा ग्राहक स्वयां फरक फरक दरय् शुल्क कायेगु यानाच्वंगु दु । केन्द्रीय बैंकं थथे ग्राहक स्वयां फरक फरक दरय् सेवा शुल्क कायेगु ज्या नं बन्द यायेत धाःगु दु । राष्ट्र बैंकया कामु कार्यकारी निर्देशक बमबहादुर मिश्रं राससलिसे खँ ल्हासें त्यासा बीबलय् प्रशासनिक सेवा, अग्रिम भुक्तानी व प्रतिबद्धता शुल्क बाहेक मेगु फुक्क कथंया शुल्क व्याज दरय् हे प्रतिविम्बित जुइमाःगु खँ धयादीगु दु ।
अथेहे बैंक व वित्तीय संस्थातय्सं एटिएम व मेमेगु कार्डवापत काइगु, धितो मूल्यांकन व बीमा थेंज्याःगु शुल्क नं सेवा प्रदायकं काइगु स्वयां अप्वः कायेदइमखु धाःगु दु । विद्युतीय माध्यमं जुइगु निगू लाख स्वयां म्हो ध्यबाया चेक क्लियरिङ्गय् बैंक व वित्तीय संस्थातय्सं थः ग्राहकतय्पाखें छुं नं कथं शुल्क काये दइमखु ।
राष्ट्र बैंकं सेवा शुल्कया रुपय् ०.२५ प्रतिशत जक कायेदइ धयातःगु दु । तर बैंक व वित्तीय संस्थातय्सं धाःसा ग्राहक स्वयां फरक फरक दरय् शुल्क कायेगु यानाच्वंगु दु ।
केन्द्रीय बैंकया निर्देशन कथं ग्राहकतय्सं थःगु स्वीकृत कर्जा सीमा स्वयां वार्षिक औसत ६० प्रतिशतं म्हो जक त्यासा उपयोग यात धाःसा त्यासा कथं मछ्यःगु ध्यबाय् जक निश्चित दरं प्रतिबद्धता शुल्क कायेदइ धयातःगु दु । तर थज्याःगु शुल्क अग्रिम रुपं धाःसा काये दइमखु । अथेहे आवधिक कर्जाय् नं स्वीकृत कर्जा सीमा स्वयां म्हो जक छ्यल धाःसा म्हो छ्यःगु ध्यबाय् छक्व जक प्रतिबद्धता शुल्क कायेदइ ।
अथेहे ५० लाखया सीमा कायम जूगु छुं नं कथंया त्यासा भुक्तानी यायेबलय् अग्रिम भुक्तानीया शुल्क कायेदइमखु । थ्व सीमा स्वयां अप्वःगु त्यासाय् जक त्यासा बीबलय् क्वःछिनातःगु सर्त, व्याजदर थप वा परिवर्तन जूगु कारणं अग्रिम रुपं त्यासा चुक्ता याये चाहे जुल धाःसा अग्रिम भुक्तानी वापन छुं नं कथं शुल्क काये मदइगु राष्ट्र बैंकं धाःगु दु ।
परियोजना कर्जाय् नं ऋणीलिसे यानातःगु सम्झौताय् न्ह्यथनातःगु ब्याजदर लगायत मेमेगु सर्त ऋणीया सहमति मकासे बैंक याकःचां जक थपघट यायेगु वा हिउपाः यायेदइमखु । थज्याःगु व्यवस्थाया कारणं ऋणीं त्यासा अग्रिम रुपं चुक्ता याये चाहे जुल धाःसा भुक्तानी वापत नं छुं कथं शुल्क कायेदइमखु ।
केन्द्रीय बैंकं स्वीकृत कयातःगु बैंक, वित्तीय संस्थां प्राथमिकता प्राप्त क्षेत्रय् थःगु कूल कर्जाय् तोके यानातःगु सीमा दुने जक त्यासा पित छ्वयेदइ । कृषि, पर्यटन, ऊर्जा थेंज्याःगु क्षेत्रय् अज्याःगु त्यासा चालु आवया मसान्त तक प्रवाह यायेमाः । ‘क’ वर्गया वाणिज्य बैंकं कृषिइ १०, ऊर्जा व पर्यटन क्षेत्रय् १५ प्रतिशत कर्जा पित छ्वयेमाः ।
अथेहे बैंकतय्सं सहुलियतपूर्ण कजाःया निंतिं व्याज अनुदान सम्बन्धी एकीकृत कार्यविधि २०७५ कथं प्रवाह जूगु सहुलियतपूर्ण त्यासा व भूकम्पपीडितयात छेँ दयेकेगु निंतिं बिइगु सहुलियतपूर्ण त्यासाया ब्याज असुल यायेबलय् व्याज अनुदान बाहेकया रकम जक सम्बन्धीत ऋणीपाखें कायेदइ ।
थज्याःगु त्यासाया किस्ता नियमित जुयाच्वंगु अवस्थाय् जक सम्बन्धित ऋणीपाखें असुल यानाः अनुदानवापतया व्याज रकम केन्द्रीय बैंकं तोके यानातःगु कथं सोधभर्ना माग यायेत नं राष्ट्र बैंकं धाःगु दु ।
LEAVE YOUR COMMENTS