शाक्यया निपु म्येँया म्युजिक भिडियो पिदन

यल(नेपालभाषा टाइम्स)- संसार्स अनलाइन टिभीया ग्वसालय् जूगु छगू ज्याझ्वलय् छक्वलं निपु म्येँया म्युजिक भिडिया पितब्वज्या याःगु दु । वंगु शुक्रवाः जूगु ज्याझ्वलय् म्येँ हालामि रविन्द्रवीर शाक्यया ‘ख्वबि त्याय् कयाः’ व ‘वनेवा वनेवा झीपिं’ म्येँया म्युजिक भिडियो पितब्वज्या याःगु खः ।

अनलाइन टेलिभिजनया अध्यक्षलिसें क्रियटिभ डाइरेक्टर स्वतन्त्र संसार महर्जनया सभापतित्व् जूगु ज्याझ्वलय् मूपाहां नेपालभाषा एकेदेमिया चान्सलरलिसें वरिष्ठ साहित्यकार यज्ञरत्न धाख्वां म्युजिक भिडियोया पितब्वज्या यानादीगु खः ।

पितब्वज्या जूगु म्युजिक भिडियोय् ‘ख्वबि त्याय् कयाः’या छाँयाकन व सम्पादन अमर चित्रकारं यानादीगु खः । निर्देशन, परिकल्पना व समाः सनमकुमार घायलं यानादीगु खःसा भेष महर्जनं सह निर्देशन यानादीगु खः । अनिक शाक्यं च्वयादीगु म्येँय् वरिष्ठ संगीतज्ञ अमरराज शर्मां लसय् हनादीगु खःसा संगीत संयोजन भूपेन्द्र वज्राचार्यं यानादीगु खः ।

थुगु म्युजिक भिडियोय् प्रकाश श्रेष्ठ, रितु श्रेष्ठ, ईश्वर श्रेष्ठ, प्रेम महर्जन, शोभा अवाले, मीना शाक्य, सिद्धार्थ शाक्य व धर्म शाक्यं अभिनय यानादीगु दु ।

अथे हे विद्याभूषण वज्राचार्य च्वयादीगु भजन म्येँया रुपय् दुगु ‘वनेवा वनेवा झीपिं’ म्येँ नं संगीतज्ञ राजोपाध्यायं लसय् हनादीगु खःसा संगीत संयोजन फिरोज वज्राचार्यं यानादीगु खः ।