नेवाः मिसातय्त लक्षित नेपालभाषा कक्षा

येँ- नेवाः मिसा दबूया ग्वसालय् पूर्वनिसें पश्चिम तक च्वंपिं स्थानीय नेवाः मिसातय्त लक्षित यानाः नेवाः भाय् स्यनेगु ज्या न्ह्यानाच्वंगु दु । वंगु साउन १ गतेनिसें न्ह्यानाच्वंगु नेपालभाषा कक्षाय् सछिम्ह स्वयां अप्वः स्थानीय नेवाः मिसातय्सं ब्वति कयाच्वंगु दु । जुमपाखें संचालन जुयाच्वंगु अनलाइन स्यनेज्याय् नेपाः दुने जक मखसें नेपाःपिनेयापिं नेवाःतय्सं नं ब्वति कयाच्वंगु दु ।

स्वनिगः पिने च्वनाच्वंपिं नेवाःतय्सं नेवाः भाय् ल्हायेगु त्वःता हयाच्वंगु व थुकिं यानाः पिने च्वंपिं नेवाःतय् म्हसीका हे लोप जुया वनीगु अवस्था वःगुलिं उकियात ध्यानय् तयाः उकथं नेपालभाषा कक्षा संचालन यानागु मिसा दबूया केन्द्रीय न्वकु विमला प्रधानं नेपालभाषा टाइम्सयात कनादिल ।

प्रदेश नं १ या इन्चार्जलिसें पूर्वाञ्चल न्वकु प्रधानयाकथं नेपालभाषा बाहेकं नेवाः मिसातय् निंतिं आदिवासी जनजाति अधिकार, मिसा अधिकार व कानूनी अधिकारया बारे नं प्रशिक्षण बीगु ज्या जुयाच्वंगु दु ।

स्वलाया निंतिं न्ह्यानाच्वंगु नेवाः भाय्या कक्षा वंगु साउन १ गतेनिसें प्रत्येक शनिवाः सनिलया ४ निसें ६ ताःईतक निघौ संचालन जुयाच्वंगु दु । कक्षा तसकं उपलब्धिमूलक जूगु व आपालं नेवाः मिसापिं लाभान्वित जूगु खँ वय्कलं कनादिल । ‘न्हापा थःगु म्हसीका तकं बी मफुपिं नेवाः मिसापिंसं आः वयाः थःगु म्हसीका बीगु जक मखु मेमेगु नं आपालं खँ नेवाः भासं धाये सयेधुंकूगु दु,’ वय्कलं कनादिल ।

मिसा दबूया केन्द्रीय नायः रश्मिला प्रजापतिलिसें सरिता श्रेष्ठ, अर्चना तण्डुकार, हिसिलिना शाक्यपिंसं प्रशिक्षण बिया वयाच्वंगु दुसा नेवाः भासं खँल्हाबल्हा यायेगु व न्ह्यसः लिसः यायेगु तरिका बारे प्रशिक्षण जुयाच्वंगु दु ।

स्थानीय ३० निसें ८० दँ तक दुपिं मिसातय्सं ब्वति कयाच्वंगु नेपालभाषा कक्षाया स्वलाया प्रशिक्षण लिपा हाकनं मेगु कक्षा नं संचालन यायेगु दबूया न्वकु मय्जु प्रधानं कनादिल ।

थ्व हे झ्वलय् मिसा दबू केन्द्रिय समितिपाखें वक्तृत्वकला कासा नं यायेगु तयारी यानाच्वंगु दु । मय्जु प्रधानं कनादीकथं स्वनिगः दुने व स्वनिगलं पिने यानाः निगू पुचलय् कासा यायेगु ग्वसाः दुगु व असोज १५ गते तकया दुने वक्तृत्व दुथ्याकेमाःगु ई बियातयागु व २४ गते कासा यायेगु कथंया तयारी जुयाच्वंगु वय्कलं नेपालभाषा टाइम्सयात जानकारी बियादिल ।

नेपालभाषालिसें वइगु दिनय् नेवाः संस्कृति, संस्कार, नखःचखः, नसात्वँसाया बारे नं जानकारी बीगु ल्याखं ज्याझ्वः यायेगु नं ग्वसाः दुगु नं वय्कलं धयादिल ।

मेखे मिसा अधिकार व कानूनी अधिकारया प्रशिक्षण बहनिसिया ७ निसें ९ ताःईतक न्ह्यानाच्वंगु व थुकी ख्वीम्ह स्वयां अप्वः मिसातय्सं ब्वति कयाच्वंगु दु ।

(भिंकाच्वना : नेवाः मिसा दबू प्रदेश नं १पाखें सुनसरीया नेवाः मिसातय्त नेपालभाषा स्यनेज्या जुयाच्वंगु बुखँयात भिंकाच्वना । ज्याझ्वः नेवाः मिसा दबूया केन्द्रिय समितिया ग्वसालय् नेवाः मिसातय् निंतिं जुयाच्वंगु खः ।)