ने. सं. ११४४ कौलाथ्व दुतिया -

तीर्थरामया आत्मवृत्तान्त सफूया चर्चा

येँ(नेपालभाषा टाइम्स)- पुलांम्ह स्वास्थ्य राज्यमन्त्रीलिसें न्हूदँ समारोह समितिया सल्लाहकार तीर्थराम डंगोलया आत्मवृत्तान्त सफू ‘काठमाडौं कांगे्रस र तीर्थराम’यात कयाः समीक्षात्मक चर्चा ज्याझ्वः जुल । उगु ज्याझ्वः वंगु शनिवाः थनया नेपाः ब्यांक्वेटय् जूगु खः ।

ज्याझ्वलय् नेवाः न्ह्यलुवा मल्ल के. सुन्दरं तीर्थराम डंगोल छम्ह तसकं इमान्दारम्ह व्यक्ति खः धइगु खँ वय्कःया उगु सफू ब्वनाः सकसिनं सीके फइ धयादिल । वय्कलं तीर्थरामया राजनीतिक जीवन अजू चायापुगुकथंया जूगु खँ कनादिसें तीर्थरामं व्यवसायकथं मचिकंया डिलरया ज्या यानादीगु खँ सफू ब्वनाः सिउगु जानकारी बियादिल ।

छन्हु वय्कःयात छम्ह मनुखं ‘मचिकंया डिलर जुइगु कि लिडर जुइगु ?’ धकाः न्यंगु न्ह्यसलं थःत थिउगु व मचिकंया डिलर त्वःताः लिडर जूगु खँ कनादिसें वय्कलं थःगु सफुतिइ तसकं इमान्दरपूर्वक आपालं खँत मग्यासे, मसुचुकुसे च्वयातःगु खँ कनादिल ।

ज्याझ्वलय् नेपाल संवत् न्हूदँ राष्ट्रिय समारोह समिति–११४३ या नायः प्रा. डा. नरेशमान वज्राचार्यं तीर्थराम डंगोलया सफू न्हू पुस्तां ब्वने हे माःगु विचाः तयादिसें थःपिंसं वय्कः न्हापा छम्ह पुलांम्ह मन्त्रीकथं जक म्हसीका वयाच्वनागु खःसा सफू ब्वनेधुंकाः वय्कःयात स्वयेगु दृष्टिकोण हे पाना वंगु विचाः तयादिल । प्रा. डा. वज्राचार्यं सफू मंत धाःसा इतिहास नं दयाच्वनी मखु धासें मेपिं नेवाः न्ह्यलुवापिंत नं इलय् डंगोलं थें आत्मवृत्तान्त सफू च्वयाः पिथनादीत इनाप यानादिल ।

येँ महानगरपालिकाया प्रवक्तालिसें १७ वडाअध्यक्ष नविन मानन्धर, नेपालभाषा ह्यमि भगवान शाक्य, ज्यापु महागुथि नेपाः येँ महनगर समितिया न्वकु नानीहेरा महर्जन लगायतं सफूया समीक्षा यानादीगु खःसा पुलांम्ह रक्षामन्त्री भीमसेनदास प्रधानं नं नुगःखँ तयादीगु खः ।