पासा पुचः गुथिया न्हूम्ह नायः रुक्मणि

येँ (नेपालभाषा टाइम्स) – पासा पुचः गुथि, युके लन्दनया १९ क्वःगु साधारणसभां मय्जु रुक्मणि मानन्धरया अध्यक्षताय् न्हूगु ज्यासना पुचः ल्यःगु दु। कोरोना संक्रमणयात ध्यानय् तयाः जूम बैठकया माध्यमं साधारणसभा च्वनाः न्हूगु ज्यासना पुचः ल्यःगु खः ।

ज्याझ्वलय् संस्थाया संस्थापकपिं अमृत स्थापित, बालमुकुन्द जोशी, शशिधर मानन्धर, अर्जुन प्रधान लगायतया सहभागिता दुगु खः । अथे हे ज्याझ्वलय् संस्थाया पुलांपिं नायःपिं डा. कृष्ण चखुं, डा. सचेतन तुलाधर, संस्थाया पूर्वी लन्दनया नायः सुशील प्रजापति, दक्षिण पश्चिम क्षेत्रया मूछ्याञ्जे प्रतिमा जोशीं नं सहभागिता प्वंकादीगु खः ।

न्वकु रुक्मणि मानन्धरया लसकुस न्वचुपाखें न्ह्याःगु ज्याझ्वलय् मूछ्याञ्जे संदीप श्रेष्ठं संस्थाया म्हसीकालिसें प्रगति विवरण न्ह्यब्वयादीगु खः । दांभरिं सविता मानन्धर व लिउ दांभरिं लिउंग युट पिंगं आर्थिक प्रतिवेदन न्ह्यब्वयादीगु खः ।

संस्थाया नायःपाखे संयुक्त श्रेष्ठं थःगु कार्यकालय् जूगु थीथी ज्याझ्वःया जानकारी बियादिसें ज्यासना पुचः विघटन जूगु घोषणा यानादीगु खः । वयां लिपा डा. सचेतन तुलाधर व सुशील प्रजापतिया निर्वाचन कमिटीं सन् २०२०-२२या निंतिं न्हूगु ज्यासना पुचःया ल्यज्या यानादीगु खः ।

सर्वसम्मतिं वइगु कार्यकालया निंतिं मय्जु रुक्मणि मानन्धरया अध्यक्षताय् ल्यःगु न्हूगु ज्यासना पुचलय् सन्दीप श्रेष्ठ व मेनका श्रेष्ठ न्वकु, प्रणिशा शाक्य मूछ्याञ्जे, लिशा दलि श्रेष्ठ लिउछ्याञ्जे, सबिता मानन्धर दांभरिं, रोजी मानन्धर लिउदांभरिं रश्मिता सिंह दर्लामि सांस्कृतिक छ्याञ्जे, सुमित वज्राचार्य कासा छ्याञ्जेकथं ल्यःगु दु ।

ज्यासना पुचःया दुजलय् किरण मानन्धर, किरणलाल श्रेष्ठ, अनिल महर्जन व अमिता श्रेष्ठयात ल्यःगु दु। संस्थाया न्हूम्ह नायः मय्जु रुक्मणिं बेलायतय् नेवाः समुदाययात छप्पँ यानाः भाषा, कला, संस्कृतिया च्वन्ह्याकेगु प्रतिवद्धता प्वंकादीगु खःसा मूछ्याञ्जे प्रणिशा शाक्यं सुभाय् देछानादीगु खः ।

सम्बन्धित बुखँ

LEAVE YOUR COMMENTS