गृहमन्त्रीया राजीनामा फ्वँसें एमाले कार्यकर्ताया मसाल जुलुस

येँ (नेपालभाषा टाइम्स)- त्रिभुवन विमानस्थलं १०० किलो लुँ पिहां वंगु घटनाय् गृहमन्त्री नारायणकाजी श्रेष्ठया राजीनामा फ्वनेगु ज्या जूगु दु । थ्व लुँ ज्वनेगु ज्याय् प्रहरीया ल्हाः मदु बरु प्रहरीं अन हयातःगु लुँ त्वःतूगु खः धासें अज्याःम्ह निकम्मा गृहमन्त्रीयात पदय् च्वनेगु अधिकार मदु धासें म्हिगः एमाले समर्थित युवा संघया कार्यकर्तातय्सं येँ मसाल जुलुस समेत पिकाःगु खः ।

लुमंकेबहः जू, विमानस्थलय् प्रहरीया सम्पूर्ण पार यानाः पिहां वनेधुंकूगु उगु लुँ भन्सार विभागया कर्मचारीतय्सं ज्वंगु खः । उकिं थुकी प्रहरीया पूरा मिलोमतो दु धकाः आशंका जुयाच्वंगु दु । तर गृह मन्त्रालयं धाःसा प्रहरीयात सुयातं ज्वने फुगु मदुनि ।

थ्व काण्डय् गृहमन्त्रीपाखें एमालेया नेतातय्त नं किकाः समाचार सम्प्रेषण यायेवं एमाले कार्यकर्ता व सञ्चारकर्मीतय्सं थुकी गृहमन्त्रीया कडा आलोचना याना हयाच्वंगु दु ।