झिगू बुँदे नेतातय्त टिकट मबीगु

येँ (नेपालभाषा टाइम्स)÷ नेकपा एमालेया अध्यक्ष केपी शर्मा ओलीयाके झिगू बुँदे सहमति यानाः पार्टी च्वनाच्वंपिं नेतातय्त वइगु मंसिर ४ गते जुइगु चुनावय् टिकट मबीगु मनस्थिति दुगु खँ सीदुगु दु ।

पार्टीया बैठकय् सहलहया झ्वलय् झिगू बुँदे सहमति यानाः पार्टीइ च्वनाच्वपिंत उम्मेदवार दयेकेगु सम्बन्धय् खँ वयेवं अध्यक्ष ओली उमिगु बारे थप सहलह यायेमानि धायेगु यानाच्वंगु खँ सीदुगु दु ।

थः प्रधानमन्त्री जुयाच्वंगु इलय् प्रधानमन्त्रीयात हे बर्खास्त यायेगुलिइ हस्ताक्षर याःपिं नेतातय्संं आत्मालोचना मयायेकं टिकट मबीगु मनस्थिति अध्यक्ष ओलीं दयेकाच्वंगु खँ सीदुगु दु । सहलहया झ्वलय् अध्यक्ष ओलीं धायेगु यानाच्वंगु दु, ‘पार्टी अध्यक्षयात हे प्रधानमन्त्रीपाखें बर्खास्त यायेत हस्ताक्षर याःपिं नेतातय्त आत्मआलोचना मयायेकं गुकथं टिकट बीगु ? वय्कःपिंसं उगु इलय् जिमिगु पाखें गम्भीर गल्ती जुल धकाः लिखित रुपय् आत्मआलोचना यायेमाः, मखुसा हाकनं नं पार्टीयात धोका बीगु सम्भावना दु ।’

१० बुँदे समझदारी यानाः एमालेय् तुं च्वपिं नेतातय्त वइगु आम निर्वाचनया निंतिं थःथःगु निर्वाचन क्षेत्रं उम्मेदवार सिफारिस नं जुइधुंकूगु दु । तर अध्यक्ष ओलीं पार्टीयात धोका बीधुंकूगुलिं आत्मालोचन मयायेकं टिकट बीमजिउगु खँय् अडान कयाच्वंगु दु ।

ओलीं अध्यक्षं लिखित मखुसां थःगु न्ह्यःने जक जूसां माफी फ्वनधाःसां नं टिकट बीगु खँ थः सतीपिं नेतातय्त धायेगु यानाच्वंगु दु । तर सहलहया झ्वलय् एमालेया गुलिखे पदाधिकारीतय्सं क्वय्या तहलं सिफारिस जुयावःपिंत टिकट बीमाःगु धापू तयेगु यानाच्वंगु दु ।

एमालेया आन्तरिक विवाद समाधन यायेत नीस्वंगु कार्यदलं २०७८ असार २७ गते झिगू बुँदे सहमति याःगु खः । व स्वयां न्ह्यः वैशाख २७ गते तत्कालीन प्रधानमन्त्री ओलीं विश्वासया मत कायेत स्वःगु खःसा नीच्याम्ह सांसद प्रतिनिधिसभा बैठकय् मवंगु खः ।

उगु इलय् झिंनिम्ह नेता १० बुँदे सहमति यानाः एमालें तुं च्वंगु खःसा ल्यंदुपिंसं नेकपा एकीकृत समाजवादी पार्टी नीस्वंगु खः । झिगू बुँदे सहमति यायेधुंकाः एमालेय् तुं च्वपिं नेतात भीम रावल, अष्टलक्ष्मी शाक्य, युवराज ज्ञवाली, सुरेन्द्र पाण्डे, योगेश भट्टराई, गोकर्ण बिष्ट, धनश्याम भुषाल, भीम आचार्य, अमृत बोहरा व रघुजी पन्त खः ।

सम्बन्धित बुखँ

LEAVE YOUR COMMENTS