नवदुर्गा द्यःया द्यःछेँय् खःम्येय्
ख्वप- थुगुसीया मोहनिया निंतिं नवदुर्गा द्यःयात खःम्येय् थ्यंके हःगु दु । वंगु विहीवाः नवदुर्गा द्यःयात द्यःछेँय् खःम्येय् थ्यंके हःगु खः । दँय्दसं मोहनिया नवमिया न्हिकुन्हु थनया नवदुर्गा द्यःयात खः म्येय्यात जात्रा यानाः बलि बीगु चलन दु ।
परम्परा व जात्राया विधिविधानकथं वंगु गथांमुगःचह्रे कुन्हु हे खःम्येय् नवदुर्गा द्यःयाथाय् थ्यंके हयेमाःगु खः । थ्वकुन्हु खःम्येय् नवदुर्गा देगलय् हयाः नकिमय् चिइमाःगु परम्परा दु । तर थुगुसी द्यःछेँया नकिं ल्ययेगु विवादया कारणं खःम्येय् हयेगु ज्या लिज्याः वंगु खः ।
ख्वप नगरपालिका वडा नं. ४ छेँ जुयाः थौंकन्हय् सूर्यविनायक नगरपालिकाय् च्वनाच्वंम्ह लक्ष्मण छुँजुं थुृगुसी नवदुर्गा द्यःया निंतिं खःम्येय् छानादीगु खः । छुँजुं द्यःयात छाःगु खःम्येय् वंगु विहीवाः नवदुर्गा द्यःया नकि इन्दिरा बनमालां पुजा यानाः देगलय् लसकुस यानाः दुकाःगु खः । नवदुर्गा द्यःया निंतिं हःम्ह खःम्येय् आः वइगु मोहनिया नवमि (स्याक्वत्याक्व) तक नकिं बनमालां हे सुसाःकुसाः यायेगु ज्या यानादी ।
खःम्येय्यात महिषासुर राक्षसया प्रतीककथं कायेगु याः । मोहनिया नवमिकुन्हु महिषासुर राक्षसया प्रतीक खःम्येय्यात नवदुर्गा देगलंनिसें जात्रा यानाः ख्वप नगरपालिकाया ब्रम्हायणी पीठय् यंकाः बलि बीगु चलन दु । तुलजा भवानीं महिषासुर राक्षसया बध याःगु मान्यताकथं खःम्येय् बलि बीगु याना वयाच्वंगु खः । नवदुर्गा द्यःयात छाइम्ह खःम्येय् घाः, खू मजूमह, निख्खर हाकुसे च्वंम्ह जुइमाः धइगु मान्यता दु ।
लुमंकेबहजू नवदुर्गा द्यःछेँया नकिं ल्ययेगु विवादया कारणं जात्रा व प्याखं संचालनय् तकं समस्या वःगु खः । लिपा सम्बन्धित खलः, पुचःलिसें स्थानीय जनप्रतिनिधि दथुइ जूगु सहलह लिपा छगू सहमति कायम यानाः बनमालायात नकिं ल्यःगु खः ।
LEAVE YOUR COMMENTS