
येँ (नेपालभाषा टाइम्स)- सत्तारुढ दल नेपाली कांग्रेस केन्द्रीय बैठकय् कोशी प्रदेशया नामाकरणबारे पार्टीया आधिकारिक धापू मवःगु खँय् न्ह्यसः पिहां वःगु दु । पार्टीं थुकी प्रस्ट धारणा मदयेकूगुलिं उगु प्रदेशय् पार्टीया राजनीति स्यना वनीगु खतरा दु धासें पार्टीया स्पष्ट धारणा माग याःगु खः ।
केन्द्रीय दुजः केशवकुमार बुढाथोकीं कोशी नामाकरणय् कांग्रेस नं एमाले अध्यक्ष ओलीया लिउ लिउ वंगु द्वपं बिसें धयादिल, ‘खुगू प्रदेशं नां तल, अन समस्या मदु । तर प्रदेश १ या नांया विषय आः तक समस्याया रुपय् हे दु । प्रदेश १ या नामाकरणबारे कांग्रेसं न्वमवाः, छाय्धाःसां अन कांग्रेस मदु, मखुसा छाय् न्वमवात ? कांग्रेस ओलीया लिउ लिउ वन, अले प्रदेशया नां कोशी तल ।’
वय्कलं प्रदेशया नामाकरण विषययात कयाः आः सुं नं नेतात गामय् वने फयाच्वंगु अवस्था मदु धासें प्रदेशया नां कोशी तयेधुंकाः जनता लय्ताये फयाच्वंगु मदु, तर नं कांग्रेसं छाय् न्ववाना मच्वंगु धकाः न्ह्यसः नं थनादीगु दु ।
उकथं हे मेम्ह केन्द्रीय दुजः नैनसिंह महरं नं कोशीया नामाकरणबारे पार्टी गम्भीर मजूगु द्वपं बियादीगु खः । वय्कलं थःगु खँ तयेगु झ्वलय् धयादिल, ‘कोशीया नामाकरण विवाद तसकं तच्वयेधुंकूगु दु, तर झीगु पार्टीया स्पष्ट धारण वःगु मदु । थुगु बैठकं कोशी प्रदेशया बारे स्पष्ट धारणा दयेकेमाः ।’
LEAVE YOUR COMMENTS