१८ वडाय् कःसिइ तरकारि पीगु तालिम

येँ – येँ महानगरपालिका १८ वडाया ग्वसालय् कःसिइ तरकारि पीगु तालिम जुल । न्हिछियंकंया उगु तालिम निन्हुतक जूगु खः । छन्हुया नीन्याम्ह नीन्याम्ह यानाः निन्हुयंकं जूगु तालिमय् न्यय्म्हेसित तालिम बीगु ज्या जूगु खः । येँ मनपा १८ वडाअध्यक्ष न्हुछेकाजी महर्जनं कनादीकथं ल्याय्म्ह व गृहणीतय् निंतिं थीथी कथंया सीपमूलक व उपलब्धिमूलक तालिम संचालन यायेगु उद्देश्य कथं थुगु तालिम संचालन यानागु खः धासें तालिमय् छम्ह हे मनू दोहरे मजुइकथंया व्यवस्था यानागु धयादिल ।

बजारय् न्यायेगु तरकारि विषादी जुइगु व स्वास्थ्यया निंतिं नं मनिंगु कथंया तरकारि वयाच्वंगु इलय् थःगु हे छेँय् पीगु तरकारिं जुइगु फाइदाया बारे नं वय्कलं कनादीगु खः ।१८ वडाय् च्वंगु सामुदायीक अध्ययन केन्द्रया भवनय् जूगु तालिम येँ महानगरपालिका कृषि विभागया रामचन्द्र पौडेलं कःसि तरकारि पीगु तरिका नापं कम्पोष्ट साः व दम्बिपाखें साः उत्पादन यायेगु बारे नं जानकारी बियादीगु खः ।