किपूया पाठ्यक्रमय् भाषा, लिपि व संस्कृति

किपू – किपू नगरपालिकां स्थानीय पाठ्यक्रमय् नेपालभाषा, लिपि व संस्कृतियात दुथ्याकीगु जूगु दु। किपू नगरपालिकाया शिक्षा समितिया म्हीग च्वंगु मुँज्यां थ्व सम्बन्धी निर्णय याःगु खः ।

उगु मुँज्यां थुगु हे दँनिसें लागू जुइकथं नगरपालिकाया स्थानीय पाठ्यक्रमय् उकथं नेपालभाषा, लिपि व संस्कृतियात दुथ्याकेगु निर्णय याःगु खः । छगूनिसें च्यागू तगिंतक ब्वंकीगु स्थानीय पाठ्यक्रमय् थीथी झिंनिगू स्थानीय विषय नं दुथ्याकीगु जूगु दु। झिंनिगू विषयय् नेपालभाषा स्यनेगु, लिपि च्वयेगु व ब्वनेगु, संस्कृतिया विषयय् माध्यम भाषा नेपालभाषा जुइगु व मेमेगु विषयय् वित्तीय, भूगोल, शैक्षिक, इतिहास, व्यक्तित्व आदि विषययात नं दुथ्याकीगु जूगु दु। थुपिं विषयत खस् भाय्यात माध्यम भाय्या रुपय् थाय् बियातःसां निगुलिं भाय् छ्यलेगु नं क्वःछिउगु दु ।

किपू नगरपालिकाया प्रमुख रमेश महर्जनया विशेष उपस्थितिइ च्वंगु मुँज्यां शिक्षा समितिया दुजःपिंत पाठ्यक्रमय् दुथ्याकेगु विषय वस्तुया धलः मुनेगु भाला नं बिउगु खः । पाठ्य सामग्रीया धलः व विषयवस्तु क्वःछीगु निंतिं असोज ७ गते च्वनीगु मुँज्यां थप सहलह याइगु खँ धाःगु दु ।