हनुमानध्वाखाया सवारी बन्दं स्थानीययात समस्या

येँ (नेपालभाषा टाइम्स)- येँ महानगरपालिकां थनया हनुमानध्वाखा लागाय् सवारी निषेध याःगु ज्यायात सकस्यां च्वछाःसां हनुमानध्वाखा लागा दुने हे छेँ दुपिं व पसः तयातःपिं मनूतय्गु अत्यावश्यक सेवाया सवारी साधन समेत पना बिउगु खँय् धाःसा असन्तोष पिहां वःगु दु ।

लिसें पूर्ण रुपं यातायात बन्द याये न्ह्यः हनुमानध्वाखा क्षेत्र दुथ्यानाच्वंगु स्थानीय वडाया जनप्रतिनिधितलिसे छुं कथं सल्लाह तकं मयाःगु खँयात कयाः अनया जनप्रतिनिधितय्सं नं असन्तोष प्वंकूगु दु । हनुमानध्वाखा लागा येँ मनपाया १९,२०, २३ व २४ वडा दुने लाः ।

हनुमानध्वाखाया थ्व लागाय् न्हापा नं सवारी साधन बन्द हे यानातःगु खःसा अन हे दुने च्वनीपिं सेना, मनपा ज्याकू, बैंक व छेँ दुपिं स्थानीय मनूतय्गु सवारी साधन–यात धाःसा वने बियाच्वंगु खः । आः फुक्क हे कथंया सवारी साधन बन्द याःबलय् अन पसः दुपिं पसल्या व छेँ दुपिं स्थानीयवासीया सवारी साधनत थःगु छेँय् तकं वने मखंगु खँ धाःगु दु ।

अन सवारी साधन पनेगु झ्वलय् लः हइगु ट्यांकर, फोहोर मुं वइगु गाडी, बैंकया ध्यबा तया यंकेमाःगु भ्यान, सेनाया गाडी तकं बन्द याःगु खः । आः स्थानीयवासीया सवारी साधन व अत्यावश्यक गाडीया समस्या समाधान यायेगु लागिं बैठक च्वनाः उमित पासया व्यवस्था यायेगु तयारी जुयाच्वंगु खँ धाःगु दु । थुकिया लागिं आः येँ मनपाया उपमेयर सुनिता डंगोलया पहलय् फुक्क पक्ष च्वनाः सहमति दयेकेत्यंगु खँ नं सीदुगु दु ।

बसन्तपू लागाय् स्थानीय जनतायात मर्का मजुइक व्यवस्थित ढंगं सवारी साधन बन्द यायेगु लागिं ताःई न्ह्यवंनिसें स्थानीय खलः पुचः, येँ मनपा व हनुमानध्वाखा दुने च्वंगु नेपाली सेनाया शार्दूलजंग गुल्मपाखें नं पहल याना वयाच्वंगु खः ।