कोरोना भाइरस : विश्वन्यंक ७३म्ह नेपाःमित सित, ५ हजार संक्रमित

येँ – विश्वन्यंक महामारी जुयाच्वंगु कोरोना भाइरस (कोभिड-१९)या संक्रमणया कारणं विदेश च्वपिं ७३म्ह नेपाःमित सीगु दु ।

गैरआवसीय नेपाली संघ (एनआरएनए)या स्वास्थ्य समितिं मुंकूगु तथ्यांक कथं बेलायतया ग्रेटर लण्डनय् २७म्ह, मिडल्याण्डय् ८म्ह, साउथ इष्टय् ११म्ह, साउथ बेष्टय् ३म्ह यानाः ४९म्ह संक्रमणया कारण सीधुंकूगु दु ।

अथेहे संयुक्त राज्य अमेरिकाय् १५म्ह, संयुक्त अरब इमिरेट्सय् ५म्ह, आयरल्याण्डय् १म्ह, जापानय् १म्ह, टर्कीइ १म्ह व नेदरल्याण्डय् १म्ह सीधुंकूगु दु । कोरोना भाइरसपाखें संक्रमति जूपिं ५ हजार २ सय ४७म्ह थ्यंगु दुसा उकी १५ सय ५०म्ह संक्रमण मुक्त जूगु दु ।

दक्षिण एसिया बाहेकया २७गू देशय् च्वनाच्वंपिं नेपाःमितय्त कोरोना भाइरसपाखें संक्रमण जूगु जानकारी नं गैरआवसीय नेपाली संघं बिउगु दु । उकी मध्ये दकलय् अप्व मध्यपूर्वी देय्त प्रभावित जूगु दु । कतार सहित मध्यपूर्वी देशय् २ हजार ३ सय नेपाःमितय्त संक्रमण जुइधुंकूगु दु ।

संघं कोरोना भाइरसाया महाकारीपाखें प्रभावित जूपिनि ग्वाहालिया निंतिं ४५गू देशय् राष्ट्रिय समन्वय परिषद् मार्फत राहत वितरणया ज्या जुयाच्वंगु खँ नं धाःगु दु ।