गुरुयोजना विरुद्ध ग्वलय् प्रदर्शन

फुक्कं पक्षलिसे सहलह यानाः सहमति यायेगु जुइ : मन्त्री भट्टराई

येँ (नेपालभाषा टाइम्स) – पशुपति विकास कोषं पशुपति क्षेत्रया विकास यायेगु नामय् हःगु गुरुयोजनाया विरोधय् म्हिगः ग्वलय् साँस्कृतिक जुलुस पिहां वःगु दु। जुलुस भुवनेश्वरी देगलं पिहां वयाः ग्वलः देय् मुक्कं लागा चाःहिउगु खः ।

सांस्कृतिक जुलुसय् थीथी जातिया सांस्कृतिक बाजं लिसें लाखे नं पिहां वःगु खःसा लाखेनं तकं ल्हातिइ हाकूगु ध्वाँय् ज्वना वःगु खः । निघौ स्वयां अप्वः न्ह्याःगु जुलसय् द्वःछि स्वयां अप्वः स्थानीयवासीं ब्वति काःगु खः । सांस्कृतिक जुलुसय् पशुपित विकास कोष खारेज याः, कोषया सदस्य सचिव डा. प्रदीप ढकालयात बर्खास्त याः, नेवाःतय्त विस्थापन याये दइमखु, प्राचीन ग्वल देय्या संरक्षण याः, जिमिगु धर्म, जिमिगु संस्कृति प्राण स्वयां यः, आः नेवाःत मदंसा गुबलय् दनेगु आदि नारा थ्वयेकूगु खः ।

स्थानीय वासिन्दातय्सं गुरुयोजना लागु यात धाःसां उकिं द्वलंद्वः मनूत विस्थापित जुइमालिगु जक मखसे पशुपतिया अस्तित्वय् तकं संकट वयेफइगु खँ धासें गुरुयोजनाया विरोध याना वयाच्वंगु खः ।

थ्वहे झ्वलय् संस्कृति पर्यटन तथा नागरिक उड्डयन मन्त्री योगेश भट्टराईं पशुपति क्षेत्रया ऐतिहासिक, सांस्कृतिक व पुरातात्विक पक्षया संरक्षण व सम्बद्र्धन यायेगु खँ धयादीगु दु। वय्कलं म्हिगः छगू ट्विट यासें उगु खँ धयादीगु खः । वय्कलं थःगु ट्विटय् पशुपति क्षेत्रया स्थानीय जात्रा पर्वया जगेर्ना यायेगु खँ धयादीगु दु। लिसें वय्कलं सरकारं फुक्कं पक्षलिसे सहलह यानाः सहमति कायम यायेगु खँ नं धयादीगु दु ।

सम्बन्धित बुखँ

LEAVE YOUR COMMENTS