मुनि विहारय् बौद्ध न्ह्यसः लिसः कासा
ख्वप(नेपालभाषा टाइम्स)÷ थनया मुनि विहारय् छवाःयंकं जूगु ख्वप नगरव्यापी विद्यालयस्तरीय बौद्ध न्ह्यसः लिसः कासाय् बागीश्वरी मावि न्हाप लाःगु दु । बिजं कासाय् बागीश्वरी मावि १०५ ल्याः कयाः न्हाप लाःगु खः । अथेहे पारागन एकेडेमी लिउ व सेक्रेट हर्ट एकेडेमि लियांलिउ लाःगु खः ।
न्ह्यसःलिसः कासाय् विजयी जुयादीपिंत बागमती प्रदेशया सांसद सुरेन्द्रराज गोसाईनं सिरपाः व दसिपौ लःल्हानादिल । ज्याझ्वलय्
वय्कलं विहार थः हे छगू विद्यालय खः धयादिसें बुद्ध, धर्म व संघ धइगु बौद्ध धर्मया आदर्श जूगु व प्रगतिशील विचारधारा नेतृत्व, नेता व संगठनप्रति इंगित जूगु खँ कनादिल ।
विहार प्रमुख भिक्षु विपश्वी महास्थविरं ख्वपय् बौद्ध जगतया ख्यलय् नवजागरण वयाच्वंगु कनाबिज्यासें स्कुल स्कुलय् मस्तय् दथुइ बौद्ध शिक्षा प्रचार यानाः थःगु आचरण व स्वभाव भिंके फत धाःसा छगू बांलाःगु व आदर्श समाज निर्माण याये फइ धयाबिज्यात । लिसें वसपोलं उकिया निंतिं विहार व ख्वपया बौद्ध समुदायं यानाच्वंगु कुतः ताःलाइगु खँ कनाबिज्यात ।
७ वडा अध्यक्ष उकेश कवां गुलिखे देसं ल्वाभःया ब्यापार यायेत युद्ध क्वचिंकाच्वंगु कनादिसें बुद्ध दर्शनपाखें आदर्श समाजया निर्माण यायेगु सयेकेमाः धयादिल । विहार दायक परिषद्या नायः रामकृष्ण बैद्यया सभापतित्वय् जूगु बिजं कासा व सिरपाः इनेज्याय् परियत्ति शिक्षिका पुनम जोशीं लसकुस यानादीगु खः ।
निवृत्त शिक्षक संघया ग्वाहालिं जूगु न्ह्यसःलिसः कासाय् निवृत्त शिक्षक संघया अध्यक्ष अम्बिकामान मानन्धरं नं न्ववानादीगु खः । कासाय् ख्वप नगरया झिंगुगू स्कुलं ब्वति काःगु खः ।
LEAVE YOUR COMMENTS