पहिचानय् आधारित संघीय गठनबन्धनया मुँज्या

येँ – पहिचानय् आधारित संघीय गठनबन्धन पक्षधरतय् छगू मुँज्या जुल । थारुवान राष्ट्रिय मोर्चाया ज्याकुथिइ गठबन्धन ज्यासना पुचःया मुँज्या च्वंगु खः ।

मुँज्याय् विशेष यानाः पहिचान पक्षधरत छप्पँ जुयाः न्ह्याः वनेगु सम्बन्धय् दुग्यंक सहलह जूगु खः । नेपाः राष्ट्रिय पार्टी लगायत तात्कालीन संविधानसभाय् प्रतिनिधित्व याःगु जनजाति पार्टी व थारु मोर्चा नापं खसान संघर्ष समितिसहितं वइगु दछिया दुने अफ्रिकी नेशनल कंग्रेस (एएनसी) मोडलकथं छगू हे चुनाव चिं कयाः चुनावी मैदानय् कुहां वनेमाःगु खँय् बः बिउगु खः ।

थुकथं छगू हे चुनाव चिं कयाः निर्वाचनय् कुहां वयेत माःगु तयारी यायेगु निंतिं नेपाः पार्टीया नायः डा. विजय सैंजूया संयोजकत्वय् सभासद आर.के. खम्बु, भानुराम थारु व संघीय मंचया नायः कुमार लिबदेनसहित प्यम्हेसिया छगू समिति नं गठन याःगु नेपाः पार्टीया नायः डा. सैंजूं जानकारी बियादिल ।

थुकथं हे टिकापुर घटनायात कयाः वइगु ७ व ८ गते थारुवानपाखें यायेत्यंगु वृहत ज्याझ्वःयात कयाः नं व्यापक सहलह जूगु खः । थ्व स्वयां न्ह्यः थारुवानपाखें पूर्व घोषित आन्दोलनया ज्याझ्वः कोरोना भाइरसया महामारी व लकडाउनया कारणं स्थगित जूगु खः ।

उगु मुँज्यां नेपाःया संविधान जारी जूगु असोज ३ गतेयात हाकुगु न्हिकथं हनेगु बारे नं सहलह याःगु खः । मुँज्याय् खम्वुवान राष्ट्रिय मोर्चाया नायः आर के खम्वु, थारुवान नेता लक्ष्मण थारु, भानुराम थारु, प्रेमवहादुर खाति, नेपाःपार्टीया नायः डा. विजय सैजु लगायतया उपस्थिति दुगु खः ।