नेपाःया भूमि मिचे मयानागु प्रमाण बीत चीनयात हाथ्या

येँ (नेपालभाषा टाइम्स) – नेपाली कांग्रेसया नेता जीवनबहादुर शाही छगू प्रेश विज्ञप्ति जारी यासें चिनियाँ सरकारी पत्रिका ‘ग्लोबल टाइम्सं’ थःत बिउगु द्वपं खण्डन यानादीगु दु । वय्कलं चीनं बिउगु द्वपं खण्डन यासें चीनं नेपाःया छगू इन्च भूमि नं मिचे मयानागु प्रमाण न्ह्यब्वयेत चीन सरकारयात हाथ्या नं बियादीगु दु ।

ग्लोबल टाइम्सं चीनं नेपाःया भूमि मिचे याःगु हल्ला न्यंकेगु ज्याय् शाहीया ल्हाः दुगु धासें समाचार प्रकाशन याःगु खः । ग्लोबल टाइम्सं नेपाली कांग्रेसलिसें भारत व पश्चिमा शक्तिं चीनं नेपाःया भूभाग अतिक्रमण याःगु धइगु मखुगु समाचार न्यंकेगु ज्या यानाच्वंगु द्वपं बिउगु खः । शाहीं जारी याःगु प्रेश विज्ञप्तिइ न्ह्यथनातःगु दु, ‘स्थलगत निरीक्षणपाखें जःला खःला देय् चीनं लालोब्गजोम क्षेत्रय् जक मखुसें मेगु सीमा क्षेत्रय् तकं नेपाःया भूमि अतिक्रमण याःगु प्रमाणत काल्पनिक मखुसे तथ्यगत आधार दु ।’

विशेषज्ञ पुचः व स्थानीय जनताया रोहबरय् अध्ययन यानाः चीनं सीमा मिचे मयाःगु पुष्टि यात धाःसा थः न्ह्याथेंजाःगु सजाय फयेत नं तयार दुगु खँ नं वय्कलं धयादीगु दु ।