अन्ततः चोलेन्द्र शम्शेर ं सर्वोच्च वने मफुत

येँ (नेपालभाषा टाइम्स)- सर्वोच्च अदालतया निलम्बित प्रधानन्यायाधीश चोलेन्द्र शम्शेर जबरायात तयातःगु महाभियोग आः निष्क्रिय जुल धासें संसद सचिवालय महासचिव भरत गौतमं क्लिन चिट् बीवं म्हिगः देय्या न्याय क्षेत्र छक्वलं तरंगित जुल ।

संसद सचिवालयया उगु पौ थःगु ल्हातय् वयेवं प्रधानन्यायाधीश जबरां सर्वोच्च अदालत वनेगु तयारी यानादीगु खःसां बार एशोसियसनया वकिलतय्सं विरोध यायेवं वय्कः सर्वोच्च वने मखन ।

बरु थीथी वकिलतय्सं सचिवालयं छ्वःगु पौ हे अवैध खः धासें उकियात हाथ्या बिउगु दु । नापं सर्वोच्च अदालतं नं संसद सचिवालययात छपु पौ छ्वसें निलम्बन फुकुवाया निर्णययात अझ स्पष्ट यायेत इनाप याःगु दु । सर्वोच्चं छ्वःगु पतिइ थ्व निलम्बन गबले फुकुवा जूगु व छु आधारय् फुकुवा जूगु धकाः प्यंगू न्ह्यसः न्यनातःगु दु ।

लिसें संसद सचिवालयं थ्व पौ च्वःगु गैर कानुनी खः धासें उकिया विरुद्ध डा. पूर्णमान शाक्य लगायतया कानुन व्यवसायीतय्सं सर्वोच्चय् छगू रिट समेत दर्ता याःगु दु । उकी संसदया पौयात कानुनी हाथ्या बियातःगु दु । अथेहे सरकारया प्रवक्ता लिसें सञ्चार मन्त्री ज्ञानेन्द्र कार्कीं प्रधानन्यायाधीश विरुद्ध तयातःगु महाभियोग जीवित हे दनि धासें आः न्हूगु संसदं उकियात न्ह्यःने न्ह्याकीगु खँ कनादीगु दु । निवर्तमान सभामुख अग्नी सापकोटां नं थ्व विषय आः संसदं निर्णय याइगु जूगुलिं सचिवालयं थुकी छुं यायेमाःगु मदु धयादीगु दु ।

महासचिव गौतमं थ्व पौ च्वयेगु लागिं राष्ट्रिय सभाया अध्यक्षयाके नं छुं कथं सहलह मयाःगु खँ अध्यक्ष गणेश तिमिल्सिनां कनादीगु दु । थौंकन्हय् प्रतिनिधि सभा मदुगु जुयाः संसदया प्रमुख धइम्ह राष्ट्रिय सभाया अध्यक्ष हे जुइ ।

न्यान्हुया लागिं छाय् अदालत वनेगु ?

थः विरुद्ध महाभियोग लगे याःगु संसद हे भंग जुइधुंकूगु कारणं थःगु निलम्बन नं फुकुवा जुल धइगु तर्क तया च्वनादीम्ह ‘निलम्बित’ प्रधानन्यायाधीश लोचेन्द्र शम्शेर जबराया सर्वोच्चय् दुहां वनेगु लिपांगु कुतः नं असफल जुल । थ्व स्वयां न्ह्यः नं वय्कलं सर्वोच्च दुहां वनेत याःगु कुतःयात बार एशोसियसनया वकिलतय्सं विफल याना बिउगु खः ।

थःगु निक्वःगु कुतः नं विफल जुइवं आः जबरां छु यानादी धइगु जिज्ञासा ब्वलंगु दु । खतुं वय्कःया कार्यकाल आः मुक्कं न्यान्हु जक ल्यं दनि । न्यान्हु लिपा वय्कः उमेर हदया कारणं स्वतः अवकासय् वनी । तर थ्व न्यान्हु तक नं ज्याकुथिइ वयाः छु यायेगु वय्कःया नियत खः धइगु न्ह्यसः थन ब्वलनाच्वंगु दु । वय्कः न्यान्हुया लागिं सर्वोच्च वनेत्यंगुया लिउने छु कारण दु धकाः नं मालेकुले जुयाच्वंगु सीदु ।