झिक्वःगु नेपालभाषा साहित्य तःमुँज्या नगामय्

किपू (नेपालभाषा टाइम्स)- झिक्वःगु नेपालभाषा साहित्य तःमुँज्या थुगुसी यःमरि पुन्हिया लसताय् नगामय् जुल । ज्याझ्वलय् नेमकिपाया केन्द्रीय सचिव व सांसद प्रेम सुवालं लोककवि राजभाई जकःमियात सम्मान पत्र लःल्हाना सम्मान यानादिल ।

अथेहे धिमे गुरु लजरमान महर्जन, दाफा गुरु गौतम महर्जन, काः बाजं गुरु इन्द्र महर्जन, उमेश महर्जन व थुगुसीया तःमुँज्या उलेज्या यानादीम्ह जेष्ठ नागरिक बौद्ध उपासक व समाजसेवी बेखालाल महर्जनयात नं सम्मान यानादिल । वय्कलं उगु ज्याझ्वलय् बाखं विधाय् उत्कृष्ट रामेश्वर जलन नापं चिनाखँय् न्हाप, लिउ, लियां लिउ व हःपा सिरपाः त्याकादीपिं छसिकथं रमेशमान महर्जन, सुवर्ण महर्जन, सूर्यलक्ष्मी महर्जन व रामचन्द्र महर्जनपिंत नं सिरपाः लः ल्हानादिल ।

ज्याझ्वलय् मूपाहां सुवालं भ्रष्टाचारीतय्त कारवाही यायेगु कि उद्योग हे द्यापं लात धकाः मिया छ्वयेगु पाय्छि जुइ धकाः सरकारयात न्ह्यसः तयादिल । ख्वप नगरपालिकाया प्रमुख सुनिल प्रजापतिं नेपालय् हडताल याकाः भारतया थीथी कलेजय् नेपालीतय्त भर्ना याकेगु अभियान सरकारपाखें हे याकातःगु द्वपं बियादिल ।

प्रा. डा. रामकृष्ण महर्जनं साहित्य व संस्कृति म्वाके मफुत धाःसा झीत पाय्छि मजूगु साहित्य व संस्कृतिं झीगु देसय् राज यायेफुगु खँ कनादिल । उगु ज्याझ्वलय् बागमती प्रदेशया सांसद सुरेन्द्रराज गोसाई, प्रा. डा. चन्द्रमान बज्राचार्य, प्रा. डा. मदनगोपाल प्रधान, मानव अधिकारवादी व्यक्तित्व बाबुराम महर्जन, बनस्पतिविद् प्रा. डा. धर्मराज डंगोल, ख्वप अस्पतालया डाइरेक्टर डा. मजेशप्रताप मल्ल, सिमा अभियन्ता रतन भण्डारी, संस्कृतिविद् कर्णदास महर्जनपिंसं नं थः थःगु नुगः खँ कनादीगु खः ।