युवक बौद्ध मण्डलपाखें राष्ट्रिय ज्ञानमाला समितिया न्हूपिं पदाधिकारीपिंत भिंतुना
यल – युवक बौद्ध मण्डल नेपालं (Y.M.B.A.) नेपाल राष्ट्रिय ज्ञानमाला समितिया न्हू निर्वाचित पदाधिकारीपिंत लसकुस नापं भिंतुना देछाःगु दु ।
युवक बौद्ध मण्डलया नायः अरणीतारा वज्राचार्यया सभापतित्वय् जूगु ज्याझ्वलय् संस्थाया वय्कलं समितिया न्हूगु ज्यासना पुचःया सकल पदाधिकारीपिंत खादां क्वखायेकाः लुमन्ति चिं नं लःल्हानादीगु खः । पुलांम्ह नायः सुरेन्द्र शाक्यं लसकुस यासें संस्थापाखें दुजःपिंत भजनया प्रशिक्षण बियाच्वनागु जानकारी बियादीगु खः । ज्याझ्वलय् नेपाल राष्ट्रिय ज्ञानमाला समितिया न्हू निर्वाचित ज्यासना पुचःया नायः मय्जु रमना श्रेष्ठं संगीतया माध्यमं बुद्ध धर्मया प्रचार प्रसार यानाः बुद्धया ज्ञान थुइकेगु नापं मैत्रीभाव तयाः ज्ञानमालाया गुणात्मक विकास यायेमाःगु खँय् बः बियादिल ।
नापं वय्कलं समितिया स्वदँया कार्ययोजना बारे जानकारी बियादिसें ज्ञानमाला भजन खलःया क्षेत्रीय मुँज्या यानाः क्षेत्रीय उपसमिति गठन यायेगु व उकियापाखें ज्ञानमाला ज्याझ्वः न्ह्याका वनेगु जुइ धयादिल । विशेष पाहांकथं झायादीम्ह यल ज्ञानमाला समितिया नायः दबलबहादुर शाक्यं ज्ञानमालाया प्रचार प्रसार व विकासया निंतिं संगीतया नं प्रशिक्षण बिया वनेमाःगु नापं ज्ञानमाला म्येँ रचना यायेगु खँय् नं ध्यान बियाः उकिया मूल्यांकन यानाः अडियो भिडियो चक्का उत्पादन यानाः ई–मिडियापाखें प्रचार यायेमाःगु खँय् बः बियादिल ।
LEAVE YOUR COMMENTS