प्रदेश १ य् मुख्यमन्त्री वल, बहुमत नं वइ ला ?

येँ (नेपालभाषा टाइम्स)- प्रदेश १ अर्थात कोशी प्रदेशया मुख्यमन्त्ती पदय् नेपाली कांग्रेस संसदीय दलया नेता उद्धव थापा नियुक्त जुयादीगु दु । तर वय्कलं संसद दुने थःगु बहुमत गय् यानाः खाकी धइगु खँ धाःसा अझ नं अन्यौल हे तिनि । वय्कलं थःके प्रदेश सभाया ४७ म्ह सांसदया बहुमत दु धासें मुख्यमन्त्री दावी यानादीगु खः ।

थापौं थःगु पक्षय् नेपाली कांग्रेसया २९, माओवादी केन्द्रया १२, नेपाल एकीकृत पार्टीया ४, जसपाया १ व सभामुख बाबुराम गौतमाय समेत थःत समर्थन दु धासें बहुमतया दावी यानादीगु खः । तर सभामुख बाबुराम गौतमया मत धाःसा वय्कःयात दइ वा दइ मखु धइगु विवादया हे विषय जुयाच्वंगु दनि । बहालवाला सभामुखं थज्याःगु मामिलाय् मत तये दु लाकि धइगु खँय् विवाद कायम जुयाच्वंगु दनि ।

थ्वहे झ्वलय् मेखे एमालें प्रदेश १ या सरकार गठनय् आवश्यक बहुमत खाकेगु लागिं सभामुखया मतगणना याये दइ मखु धकाः प्रदेश प्रमुख पर्शुराम खापुङया ध्यानाकर्षण याःगु दु । एमाले संसदीय दलया नेता एवं पूर्व मुख्यमन्त्री हिक्मतकुमार कार्कीं म्हिगः प्रदेश प्रमुखयात थ्व खँय् ध्यानाकर्षण यासें ज्ञापनपौ बिउगु खः । न्हू वःगु सरकारं सभामुखयात समेत गणना यानाः बहुमत साबित याइगु सम्भावना दु धासें अथे मयायेत ध्यानाकर्षण याःगु खः । सभाया अध्यक्षता यानाच्वंम्ह मनुखं मत बराबर जूसा जक मत बी खनीगु प्रावधान दु धकाः नं एमालें दावी याःगु दु ।

यदि मुख्यमन्त्रीयात सभामुखं मतदान यात धाःसा जक बहुमत खाके फइगु सम्भावना दु । थज्याःगु अवस्थाय् सभामुखं राजीनामा बियाः मेम्हेसित सभामुख दयेकेगु व मुख्यमन्त्रीया पक्षय् बहुमत खाके माली धइगु बिचाः नं पिहां वयाच्वंगु खँ धाःगु दु ।