नेपाःया २० द्वः मस्तय्त न्हूगु वासःया प्रयोग

येँ – संसारया थीथी देशं उत्पादन याइगु न्हून्हूगु वासःत सार्वजनिक प्रयोगय् वने न्ह्यः नेपाः थेंज्याःगु गरिब देशय् प्रयोग याइगु चलन दु । नेपालय् नं थीथी इलय् अज्याःगु वासः प्रयोग याःगु खँयात कयाः विवाद पिहां वयेगु याः । थ्वहे झ्वलय् नेपालय् छुं ई न्ह्यः तिनि चुपचापपूर्वक टाइफाइड ल्वय् सम्बन्धी छगू न्हूगु भ्याक्सिनया प्रयोग याःगु खँ पिहां वःगु दु ।

अमेरिकाया परोपकारी संस्था लिब एण्ड मेलिन्डा गेट्स फाउन्डेशनया आर्थिक ग्वाहालिइ बेलायतया अक्स्फोर्ड विश्वविद्यालय व नेपाःया समेत चिकित्सकत जानाः थ्व भ्याक्सिनया प्रयोग याःगु खः । वंगु सन् २०१७ निसें २०१९ तक पाटन अस्पतालय् थ्व भ्याक्सिनया प्रयोग जूगु खँ बीबीसी नेपाली सेवां जने याःगु दु ।

थ्व ज्याय् यलया नेपाल परिवार विकास प्रतिष्ठान व वासः पासा पोलिक्लिनिक्स नं संलग्न जूगु समाचारय् धयातःगु दु । थ्व वासःया प्रयोग धाःसा सफल जूगु खँ न्यू इंगल्याण्ड जर्नल अफ मेडिसिनय् न्ह्यथनातःगु दु । थ्व वासःया प्रयोग ९ महिनानिसें १६ दँ तक दुपिं २० हजार मस्तय्त प्रयोग याःगु खः ।

नेपाःया नापनापं मलावी र बंगलादेशया मस्तय्त नं थ्व भ्याक्सिन प्रयोग यानाः स्वःगु खः । नेपाःया मस्तय्त प्रयोग यानाः सफल जूगुलिं आः थुकियात औपचारिक रुपं पाकिस्तानय् प्रयोग यायेत्यंगु खँ नं समाचारय् धयातःगु दु । आः पाकिस्तानया ९० लाख मस्तय्त थ्व भ्याक्सिन बीगु तयारी यानाच्वंगु खँ धाःगु दु ।

थ्व वासःया कारणं आः टाइफाइड थेंज्याःगु दक्षिण एशियाय् व्यापक जुयाच्वंगु ल्वय्यात छुं हद तक नियन्त्रण याये फइगु खँ धाःगु दु ।
तर नेपालय् धाःसा थज्याःगु वासः मस्तय्त प्रयोग याःगु खँयात कयाः चिकित्सकतय् दथुइ थीथी खँ पिहां वःगु सीदुगु दु । नेपाःया द्वलंद्वः मस्तय्त थज्याःगु वासःया प्रयोग यायेगु धइगु उमिगु स्वास्थ्यय् खेलवाड यायेगु सरह जुइगु खँ धया हःगु दु ।

नेपाः दुने माकःयात थीथी वासःया प्रयोग याःगु खँय् नं ताःहाकः विवाद पिहां वःगु खः । तर थ्व प्रयोगय् संलग्न चिकित्सकतय्सं धाःसा प्रयोगया लागिं सम्पूर्ण प्रक्रिया पूवंकाः जक ज्या न्ह्याकागु दावी याःगु दु । थुकी संलग्न मस्तय्त ताःई तक हे निगरानीइ तयेगु खँ नं उमिसं धाःगु दु ।

सम्बन्धित बुखँ

LEAVE YOUR COMMENTS