मेयर बदनाम यायेत फोहोरया राजनीति

येँ (नेपालभाषा टाइम्स)- स्थानीय निकायया चुनाव न्ह्यःने थ्यंकः वयेवं सत्तारुढ दलतय्सं फाहोरया राजनीति शुरु याना हःगु दु । एमालेपाखें निर्वाचित येँया मेयरयात बदनाम यायेगु ताः तयाः वंगु छुं न्हि न्ह्यवंनिसें येँय् फोहोर द्वँचिंकेगु ज्या याना हःगु खँ सीदुगु दु ।

फोहोर वांछ्वये यंकेगु सिसडोल डम्पिङ साइट वनेगु लँपुइ लाःगु पासाङ ल्हामू मार्गय् हानं विरोध प्रदर्शन याकाः येँय् फोहोर द्वँचिंकेगु ज्या याना हःगु खँ विज्ञ सूत्रं धाःगु दु । थुपालय् पासाङ ल्हामू मार्गय् विरोध प्रदर्शन याकाः फोहोरया गाडी पनेगु ज्याय् कांग्रेसया स्थानीय नेतात सक्रिय जूगु खँ नं सूत्रं धाःगु दु ।

पासाङ ल्हामू मार्गय् छुं ला न्ह्यः नं विरोध प्रदर्शन जूगु खः । उगु इलय् उमिगु हे माग कथं अन सतक पीच याना बीगु बचं संघीय सरकारं बिउगु खः । तर बचं बिउसां सतक पीच यायेगु ज्या धाःसा मन्ह्याकू । थुकिं यानाः स्थानीय जनतां हानं विरोध प्रदर्शन यासें लँ पना बिउगु खः । थुपालय् धाःसा सरकारं उमिगु माग पूवंका बी धकाः बचं बीगु जक मखु, उमित वास्ता तकं मयाःगु खँ सूत्रं धाःगु दु ।

उमिगु आन्दोलनं यानाः येँया थाय्थासय् वंगु छुं न्हि न्ह्यवंनिसें हानं फोहोर द्वँचिनेगु शुरु जूगु दु । थुकिं यानाः महानगरवासीतय्सं मनपां फोहोर मुनेगु ज्या मयाः धकाः गुनासो याना हःसां महानगरपालिका सूत्रं धाःसा थौंकन्हय् सतकय् फोहोर द्वँचिनाच्वंगुया लिउने मनपाया छुं हे ल्हाः मदुगु खँ धाःगु दु । पासाङ ल्हामू मार्गया स्थानीय जनताया माग पूवंकाः फोहोरया ट्रक वनीगु लँ चायेका बी माल धायेगु लागिं येँ मनपाया मेयर विद्यासुन्दर शाक्यं प्रधानमन्त्रीयात नापलायेगु कुतः यानादीगु दुसां प्रमपाखें नापलायेगु ई तकं मबिउगुनिगु खँ नं सीदुगु दु ।

यदि संघीय सरकारं पासाङ ल्हामू मार्गया स्थानीय जनतालिसे वार्ता यानाः उमिगु माग पूवंका बिल धाःसा येँय् फोहोरया समस्या तुरुन्त हे समाधान जुइगु खँ नं मनपा सूत्रं धाःगु दु । सडक विभाग अन्तर्गत लाःगु सडक पीच यायेगु वा मर्मत सम्भार यायेगु अधिकार मनपायात मदुगु जुयाः थुकी मनपां हस्तक्षेप याये मछिंगु खँ नं सूत्रं धाःगु दु ।

थ्वहे झ्वलय् म्हिगःनिसें येँय् फोहोर मुनेगु शुरु जुल धकाः खँ वःसां पूवंक मुना यंकेगु ज्या धाःसा अझं मजूनि । स्थानीयवासीयात क्यने थें जक फोहोर मुनेगु ज्या जुयाच्वंगु व यक्व थासय् अझं मुं मवःगु खँ धाःगु दु । थुकिं यानाः स्थानीयवासीयात यक्व सास्ती जुयाच्वंगु खने दयाच्वंगु दु ।

सम्बन्धित बुखँ

LEAVE YOUR COMMENTS