वायु प्रदूषण नियन्त्रणया निंतिं दुगु उपाय नाले

येँ(नेपालभाषा टाइम्स)- येँ महानगरपालिकाया उपप्रमुख सुनिता डंगोलं अप्वया वनाच्वंगु वायु प्रदूषण नियन्त्रणया निंतिं खँ जक ल्हायेगु मखसे समाधान गुकथं याये फइ धइगु खँय् नं ध्यान बियाः उकिया कार्यान्वयन यायेगुपाखे लगे जुइत इनाप यानादीगु दु ।

येँ महानगर उपप्रमुख डंगोलं वायु प्रदूषण नियन्त्रणया निंतिं प्रदूषक क्रियाकलापया कारणया बारे जक विचाः यायेगु व अथे याये जिउ, थथे याःसा जी धकाः खँ ल्हायेगु जक मखसे समाधानया आपालं विधि दुगु व उकियात अवलम्बन यायेगु प्रक्रियापाखे वने हथाय् जुइधुंकूगु खँ धयादीगु दु ।

येँ महानगरपालिका वातावरण व्यवस्थापन विभागं ‘वायु गुणस्तर व्यवस्थापन व सुशासन’ विषयय् ग्वसाः ग्वःगु अन्तक्र्रिया ज्याझ्वलय् नवासें उपप्रमुख डंगोलं उगु खँ धयादीगु खः । वय्कलं छु गज्याःगु विधि नाल धाःसा याउँक समाधान जुइ । उकिया बारे खँल्हाये, कार्यान्वयनय् वने नु धासें फय्या स्वच्छताया निंतिं उपलब्ध उपायया इमान्दारपूर्वक कार्यान्वयनय् नं बः बियादिल ।

वय्कलं स्वच्छ व स्वस्थ सहरया निंतिं येँ महानगरं नीति निर्माण याःगु व उकिया निंतिं बजेट तकं तर्जुमा यानागु जानकारी नं बियादिसें थ्व प्राविधिक व बहुपक्षीय विषय जूगुलिं प्राविधिक ग्वाहालि कायेमाःगु खःसा उकिया निंतिं सहकार्य यायेत महानगर तयार दु धयादिल ।

प्रमुख प्रशासकीय अधिकृत वसन्त अधिकारीं वातावरण झन् झन् स्यनावनाच्वंगु धासें थुकिं मेपिंत मखसे थःत हे नोक्सानी यानाच्वंगु खँ व्यक्ति थम्हं अनुभूति याये फइ जूगुलिं वातावरण सुधारया निंतिं सुनानं छुं धयाच्वनेम्वाः, व्यक्ति थम्हं हे व्यवहारय् सुधार याःसा गाः, याये नं फइ धयादिल ।

वातावरणविद् भूषण तुलाधरं थःगु प्रस्तुतीकरण बियादिसें स्वनिगलय् सछि स्वयां अप्वः उद्योग कलकारखाना दुगु व व स्वयां नं थन चले जुइगु सवारी साधनपाखें उत्सजर्नन जुइगु कुँ व धू (फोहर) च्याकेगु आचरण वायु प्रदूषणया निंतिं दकलय् अप्वः जिम्मेवार खः धयादिल । विश्वन्यंकं दँय्दसं ७० गू लाख मनू वातावरण प्रदूषणया कारणं सिनाच्वंगु व नेपालय् नं पीनिद्वः व सछि सिना च्वंगुलिइ येँय् जक न्याद्वःम्ह सिनाच्वंगु दु धयादिल ।

वायु प्रदूषण नियन्त्रण व थ्व सम्बन्धय् ज्या यानाच्वंगु सरोकारवाला निकायया सहभागिता दुगु ज्याझ्वलय् समूहगत रुपं वायु प्रदूषण नियन्त्रया अभ्यासया कुतः नं याःगु खः ।

सम्बन्धित बुखँ

LEAVE YOUR COMMENTS