ने. सं. ११४४ ञलाथ्व नवमी -

बुद्धभूमिइ बुद्धया मूर्ति तोडफोड

थीथी संघ संस्थापाखें विरोध, पुनस्र्थापनाया माग

येँ – बुद्ध जन्मभूमि लुम्बिनी लागाया हे छगू जिल्ला रुपन्देहीइ बुद्धया न्यागू मूर्ति तोडफोड याना तःगु दु । रुपन्देहीया बुटवल बेलहिया सडक खण्ड अन्तर्गत तिलोत्तमा नगरपालिकाया ६ लेन सतकया दथुइ थ्व बुद्धया मूर्ति झ्वःलिक तयातःगु खः । म्हीग चान्हय् थ्वहे मूर्तित तोडफोड याना तःगु खः । अन तयातःगु न्यागू मूर्ति तोडफोड यानाः वांछ्वया तःगु खः ।

सतकया मेडिएनय् तयातःगु मूर्तित मध्ये शंकरनगर चोकंनिसें नयाँमिल तकया न्यागू मूर्ति तोडफोड यानातःगु खँ तिलोत्तमा नगरपालिका मेयर बासुदेव घिमिरें कनादीगु दु । तिलोत्तमा नगरपालिकाया हे लगानीइ बुटवल बेहलहिया सडक खण्ड अन्तर्गत तिलोत्तमा नगरपालिकाया योगिकुटींनिसें मंगलापुरतक बुद्धया मूर्ति तयातःगु दु ।

बुद्ध जन्म जूगु लागा जुयाः नगरया म्हसीका बीत नं अन बुद्धया मूर्ति तःगु खः । वंगु वैशाख १ गते तिनि प्रदेश ५ सरकारया उद्योग, पर्यटन वन तथा वातावरण मन्त्री लिला गिरीं उगु बुद्धमूर्तिया उलेज्या यानादीगु खः । थ्व बुद्धि मूर्तित सुनां व छाय् तोडफोड यात धइगु खँ धाःसा आः तक सी मदुनिगु खँ प्रहरीं धाःगु दु ।

लँय् तयातःगु झ्वःलिं हे मूर्ति तोडफोड याना तःगुलिं थ्व ज्या सुनियोजित रुपं हे याःगु जुइमाः धकाः अनुमान याःगु दु ।मूर्ति तोडफोड याःगु थ्व घटनायात सकभनं विरोध याना हःगु दु । नेपाःया बौद्ध संस्थातय्गु राष्ट्रिय संगठन धर्मोदय सभां थ्व ज्यायात अतिकं निन्दनीय धासें क्षोभ प्वंकूगु दु ।

धर्मोदय सभाया महासचिव सागरमान वज्राचार्यं छगू विज्ञिप्ति जारी यासें थ्व ज्या न्ह्याम्हेस्यां याःगु खःसां उमित कारवाही यानाः बुद्ध मूर्तिइ यथास्थानय् पुनस्र्थापना यायेत माग यानादीगु खः । विज्ञप्तिइ छुं ई न्ह्यः तिनि सिद्धार्थ राजमार्गय् भगवान बुद्धया मूर्ति चीकेगु कुतः याःगु खँ न्ह्यथनातःगु दु ।

अथे हे सत्तारुढ दल नेकपाया ल्याय्म्हतय् संगठन युवा संघपाखें नं छगू वक्तव्य पिकासें देशय् विद्यमान धार्मिक सहिष्णुता खलबल यायेगु ताः तयाः अवाञ्छित तत्वं थ्व ज्या याःगु खः धासें उमित तुरुन्त ज्वनाः कारवाही यायेत माग याःगु दु ।