चीनया गाङ्सू प्रान्तया राजधानीइ लकडाउन

एजेन्सी- कोरोना संक्रमण अप्वयेवं चीनया गाङ्सू प्रान्तया राजधानी लान्झोउय् लकडाउन तःगु दु । अन्तर्राष्ट्रिय सञ्चार माध्यमं धाःकथं ४० लाख जनसंख्या दुगु लान्झोउ शहरय् मंगलवाः निसें लकडाउन तःगु खः । लान्झोउया अधिकारीतय्सं विज्ञप्ति पिकयाः लकडाउनया इलय् अति आवश्यक मजुइकं छेँय् नं पिहां मवयेत इनाप याःगु दु । विज्ञप्तिइ माःगु सामान व वासः कायेत बाहेक पिहां मवयेत धयातःगु दु । उत्तरी चीनय् नं मनूतय्त छेँय्नं पिहां मवयेत कडा आदेश बिइ धुंकूगु दु ।

चीनय् सोमवाः २९ म्ह मनूतय्के कोरोना खनेदुगु खःसा लान्झोउलय् खुम्हेसिके कोरोना खनेदुगु खः । अधिकारीतय्सं चीनय् संक्रमण अप्वयेफु धयावयाच्वंगु दु ।