गुथि कम्प्लेक्स जनतां पना बिल

‘जनताया छेँ थुनेगु, खाली जग्गाय् कम्प्लेक्स दयेकेगु ?’
येँ – थनया धरहराया दक्षिणपाखे लाःगु खाली जग्गाय् विजनेश कम्प्लेक्स दयेकेगु ज्या शुरु जुइवं विवाद ब्वलंगु दु ।
वंगु लछि ति न्ह्यः उगु थासय् बार ग्वयेगु ज्या जूगु खःसा लिपा स्थानीय जनता व सम्बन्धित वडाया वडाध्यक्ष लगायत नापसं लाःगु वडां उगु थासय् कम्प्लेक्स दयेके मजिउ धकाः दबाब बियाः अन ग्वयातःगु बार थुनेगुया लिसें जग तयेत म्हुयातःगु गाः नापं ल्हाका बिउगु खः । गुथि संस्थानया नामय् दुगु उगु जग्गा संस्थानं टेन्डर आह्वान यानाः व्यापारिक कम्पनीयात बिउगु खःसा स्थानीय जनतां धाःसा अन कम्प्लेक्स दयेके मजिउ धासें उकिया विरोधय् मनपा लगायत थीथी थासय् उजुरी तयेगु ज्या याःगु खः । २२ वडाया वडाध्यक्ष चिनिकाजी महर्जनं ‘नेपालभाषा टाइम्स’यात बियादीगु जानकारी कथं न्हापा उगु जग्गाय् थापा खलःया भ्वय् नयेगु सतः दुगु खःसा लिपा उगु सतः जीर्ण जुयाः दुना वनेवं तत्कालिन इलय् दरवार नाप स्वापू दुम्ह हरि शम्शेरं जीर्णोद्वार याके मबिउगु खः ।

सतःया संरक्षण यायेमाःगु गुथिं संस्थानं अन कम्प्लेक्स दयेकेत स्वीकृत बीगु ज्या गलत जूगु धासें महर्जनं न्ह्यःने धयादी, ‘सडक चिब्या जुल धकाः जनताया छेँ थुनेगु ज्या यानाच्वंगु सरकारं थःगु हे मातहतया खाली जग्गाय् धाःसा कम्प्लेक्स दयेकेत स्वीकृत बीगु गुलि पाय्छि जुइ ?’वय्कलं थः न्ह्याबलें नं उगु थाय् संरक्षण यायेमाःगु खँय् अडिग दु धासें गुथि संस्थानं उगु जग्गाया संरक्षण यायेमाःगु खः उगु हे संस्थां अन व्यापारिक कम्प्लेक्स दयेकेत स्वीकृत बीगु उचित मजू धयादिल ।
गुथि संस्थानया नामय् लालपूर्जा दुगु जग्गा टेन्डर मार्फत कम्प्लेक्स दयेकेगु ज्याय् विरोध यासें ११ वडाया वडाध्यक्ष हिरालाल तण्डुकारं नं खाली जग्गा त्वःतेमाःगु थासय् अःखतं संस्थानं टेन्डर याःगु ज्या गलत जुल धयादिल । तर अन नक्सा पास यायेत वडां गुकथं स्वीकृत बिल धकाः न्यनागु न्ह्यसःया लिसः बिसें वय्कलं धयादिल, ‘वडां स्वीकृति कायेगु ज्या स्थानीय निर्वाचन जुइ न्ह्यः हे याःगु खः । जिं आः वयाः तिनि उगु खँ सिल ।’ वय्कलं कनादी कथं नक्सा पास जूसां नक्सा दर्ता याःगु मिति व चलानी नम्बर धाःसा मदु ।

अथेहे वय्कलं उगु जग्गाय् छेँय् दयेकेगु सम्बन्धय् मुद्दा आः अख्तियारय् वनेधुंकूगु जानकारी नं बियादीगु दु । मेखे मनपाया उपमेयर हरिप्रभा खड्गी श्रेष्ठं कम्प्लेक्स दयेकेगु ज्या दिकेगु निर्णय जुइधुंकूगु जानकारी बियादीगु दु । वय्कलं ‘नेपालभाषा टाइम्स’ लिसें खँ ल्हासें तत्काल निर्माण मयायेत व उकिया बारे निर्णय यायेगु लागि छगू समिति दयेकागु जानकारी नं बियादिल । म्हिगः गुथि संस्थानया पदाधिकारी नाप सहलह यासें वय्कलं उगु निर्णय जूगु जानकारी बियादीगु खः । उगु कमिटीया प्रतिवेदन वयेधुंकाः जक उगु जग्गाया बारे निर्णय यायेगु खँ नं वय्कलं कनादीगु दु । उगु जग्गा नगरपालिकायात आवश्यक जुल धाःसा नगरपालिकां हे कायेफइगु खँ कनादिसें उपमेयर श्रेष्ठं मेयर विद्यासुन्दर शाक्यनाप नं सहलह यानाः थ्व बारे निर्णय यायेगु खँ कनादिल । वय्कलं न्ह्यःने धयादी, ‘गुथि संस्थान नाप सहलह जूगु इलय् संस्थानया पदाधिकारीपिंसं नगरपालिकां हे उगु जग्गा न्यानाकाःसां जिउ धइगु सुझाव दु । मेयर साहेव नाप सहलह यानाः निर्णय यायेगु जुइ ।’
९ आना १ पैसा दुगु उगु जग्गाय् पार्किङया व्यवस्था यायेगु वा छु यायेगु धइगु बारे नं सहलह जुयाच्वंगु खँ कनादिसें तत्काल अन कम्प्लेक्स दयेकेगु ज्या धाःसा मजुइगु जानकारी नं वय्कलं बियादीगु दु ।