ने. सं. ११४४ कौलाथ्व पारू - नःलास्वनेगु

मिस नेवाः पोखरा चैतया न्हापांगु वालय्

येँ- नेवाः खलः कास्कीया ग्वसालय् ‘मिस नेवाः पोखरा’ थुगुसी थ्व हे वइगु चैतया न्हापांगु वालय् जुइगु जूगु दु । खलकं बिउगु जानकारी कथं थ्व हे वइगु चैत ८ गते पोखराया राष्ट्रिय सभागृहय् उगु ज्याझ्वः जुइ । खलकं पोखराया स्थानीय नेवाः मिसातय् सुलाच्वंगु प्रतिभायात न्ह्यःने हयेगुनापं नेपालभाषा, कला, संस्कृति व थःगु म्हसीकायात ल्यंका तयेगु ताःतुनाः थुकथंया प्रतिभा न्ह्यब्वयेगु कासाया ग्वसाः ग्वया वयाच्वंगु खः ।

खलःपाखें वंगु मंगलवाः छगू पत्रकार सम्मेलन यासें कासाया निंतिं आवेदन खुल्ला जूगु जानकारी बिउगु दु । कासाय् १६ दँनिसें २२ दँतकया नेवाः समुदायया मिसातय्सं ब्वति काये फइगु व कासाय् ब्वति कायेत माघ १० गतेतकया दुने आवेदन बी फइगु ग्वसाः खलकं जानकारी बिउगु दु । माघ १२ गते अडिसन लिपा माघ १७ गतेनिसें छनोट जूपिं प्रतियोगीपिंत प्रशिक्षण बीगु पत्रकार सम्मेलनय् जानकारी बिउगु दु । खलःपाखें दँय्दसं थुकथंया कासा याना वयाच्वंगु खःसा आवंनिसें निदँय् छकः कासा यायेगु जानकारी नं पत्रकार सम्मेलनय् बिउगु खः ।

कासाय् उपाधि विजेतां पीद्वः, फस्ट रनरअपं नीन्याद्वः व सेकेन्ड रनरअपं झिंन्याद्वः तका दां, दसिपौलिसें थीथी उपहार प्राप्त याइगु जानकारी नं बिउगु दु । थुकियालिसें उत्कृष्ट नेवाः भाय्या निंतिं न्हय्द्वः तकालिसें फोटोजेनिक, बेस्ट पर्सनालिटी, ट्यालेन्ट, भ्यअर्स च्वाइस, बेस्ट फ्रेन्डली, बेस्ट स्माइल उपाधि विजेतायात न्याद्वः न्याद्वः तका दां लःल्हायेगु नं जानकारी बिउगु दु ।

अडिसनपाखें छनोट जूपिंसं नेपालभाषा, कला–संस्कृति, नेवाः म्येँ, संगीत, नेवाः प्याखं, नेवाः सभ्यता, व्यक्तित्व विकास लगायतया बारे जानकारी काये फइगु नेवाः खलः कास्कीया अध्यक्ष अशोक पालिखें पत्रबार सम्मेलनय् जानकारी बियादिल ।

कासायात तःजिक क्वचायेकेया निंतिं विमल श्रेष्ठया संयोजकत्वय् छगू आयोजक समिति नं गठन याःगु दु । श्रेष्ठया संयोजकत्वय् अर्थ व्यवस्थापन, तालिम संयोजन, कोरियोग्राफर, स्वयमसेवक, फोटोग्राफी, टिकट व्यवस्थापन, सहयोगी सांस्कृतिक ज्याझ्वः, निर्णायक मण्डल, साउण्ड व हल व्यवस्थापन, ड्रेस डिजाइन, प्रचारप्रसार लगायत थीथी उपसमिति नं गठन याःगु दु ।