संकिपा क्यनेत सम्झौता

किपू(नेपालभाषा टाइम्स)÷ हालय् जक निर्माण जूगु छगू चीहाः संकिपा क्यनेत निर्माता व हल संचालक दथुइ छगू सम्झौता जूगु दु । मगन इन्टरटेनमेन्टया ब्यानरय् रजिन महर्जनया लेखन व निर्देशनय् तयार जूगु चीहाः संकिपा ‘उच्च शिक्षा, एडुकेशन फर अ कमनर’ क्यनेत कीर्तिपुर सिनेप्लेक्सलिसे वंगु आइतवाः सम्झौता याःगु खः ।

मगन इन्टरटेनमेन्टया निर्माण नियन्त्रकलिसें चीहाः संकिपाया सह निर्देशक विक्रम महर्जन व सिनेप्लेक्सया संचालक विजयलाल डंगोलं सम्झौता पती ल्हाःचिं तयादीगु खः । वइगु माघ १२ गते मगनया अफिसियल युट्युब च्यानलपाखें सार्वजनिक यायेत्यंगु उगु संकिपा माघ ११ गते कीर्तिपुर सिनेप्लेक्सय् विशेष प्रिमियर शो यायेत्यंगु दु ।

वैदेशिक शिक्षाय् अप्वया वनाच्वंगु मोह व थुकिं यानाः सामान्य वर्गया परिवारय् खने दयाच्वंगु तिक्तताया विषययात कःघानाः तयार यानातःगु चीहाः संकिपाय् लक्ष्मीकुमार महर्जन, क्रिशल श्रेष्ठ, कृष्णभक्त महर्जन लगायतया कलाकारं अभिनय यानादीगु दु । नेपालभाषा व नेपाली निगुलिं भासं निर्माण याःगु चीहाः संकिपाया प्रमोशन यायेगु ल्याखं ‘आफै जान्ने’ शीर्षकया म्येँ धाःसा सार्वजनिक यायेधुंकूगु दु ।

संकिपाया निर्माता रामचन्द्र महर्जन र जमुना महर्जन खःसा कलर करेक्शन व कला निर्देशन संजिवरत्न शाक्यं यानादीगु दु । उत्तम हुमागाइँ नं छाँयाकन यानादीगु निगुलिं भाय्या चीहाः संकिपाया छन्हुं हे युट्युबपाखें रिलिज यायेगु निर्माण कम्पनीं जानकारी बिउगु दु ।

नेपालभाषा टाइम्स

च्वमिया मेमेगु

• भ्वँतय् न्हापांखुसी नेपालभाषा साहित्य तःमुँज्या
• न्हूदँया लसताय् येँ–चौतारा मोटरसाइकल र्‍याली
• संस्कृतिविद् गणेशराम लाछिया ७५ क्वःगु बुन्हि हन
• लुँया भावय् न्हूगु कीर्तिमान
• नेपालय् न्ह्यानाच्वंगु जुजुवादी आन्दोलन, भारतीय हिन्दूत्वया लिच्वः