लुँया भाः छथुं हे निद्वः तका थहां वन

येँ (नेपालभाषा टाइम्स)÷लुँयागु भाः म्हिगः छक्वलं हे तोलां निद्वः तका थहां वन । नेपाःया लुँ वहः बजारय् म्हिगः लुँयागु भाः तोलां १ लाख २१ हजार तका थ्यंगु खः । थ्व धइगु म्हीगया भाः स्वयां निद्वः तका अप्वः खः । अन्तर्राष्ट्रिय लुँ बजारय् प्रतिऔंश ३७ डलरं थहां वनाः २०७३ डलर कायम जूगु खः ।

अन्तर्राष्ट्रिय बजारय् लुँया भाः थहां वंगु कारण धाःसा अमेरिकाय् अप्वया वनाच्वंगु बेरोजगार जूगु खँ नेपाल सुनचाँदी व्यवसायी महासंघया पुलांम्ह अध्यक्ष लिसें बजार विश्लेषक तेजरत्न शाक्यं कनादीगु दु । वय्कःया कथं अमेरिकाय् बेरोजगारी अप्वल धाःसा लगानीकर्तात लुँपाखे आकर्षित जुइगु कारणं यानाः नं लुँयागु भाः थहां वंगु खः ।

उकथं हे अमेरिकी बजारय् मुद्रास्फीति अप्वया वनेफइगु आशंका यानाः नं लगानीकर्तात लुँइ आकर्षित जूगु खँ वय्कलं कनादीगु दु । मुद्रास्फीति अप्वःगुया नापनापं बेराजगारी अप्वयेवं लगानीकर्तात लुँया बजारय् आकर्षित जूगु खः ।

अथे हे अमेरिकी फेडरल बैंकं ब्याजदर म्हो याये फइगु आशंका यानाः नं लगानीकर्तात लुँइ आकर्षिक जूगु खँ वय्कलं धयादीगु दु । अमेरिकी फेडरल बैंकं सन् २०२४ या जनवरीइ हे ब्याजदर क्वकाये फइगु अनुमान याःगु खःसा आः वयाः मार्चं नं ब्याजदर म्हो यायेगु तयारी धाःसा यानाच्वंगु मदु ।

अमेरिकी अर्थशास्त्रीतय्गु विश्लेषण कथं वइगु जुन महिना मथ्यंकं फेडेरल बैंकं ब्याजदर क्वकाइगु सम्भावना मदु धासें जुनं जक ब्याजदर क्वकाइगु अनुमान यानाहःगु दु । अमेरिकी फेडरल बैंकं ५.२५ निसें ५.५० प्रतिशत जक ब्याज बियाच्वंगु दु । अमेरिकी इतिहासय् २३ दँ लिपा ब्याजदर थुलि कुहां वःगु खः ।

सम्बन्धित बुखँ

LEAVE YOUR COMMENTS