ग्वंगः बुँया लसना प्रि–स्कुल

थौंकन्हय् येँया यक्व धयाथें नेवाःत दुनेया नगर त्वःताः चक्रपथ जःखः च्वं वनेधुंकूगु दु । थुखेपाखे सरे जूपिं यक्वसित थः नचापिं मस्त गन स्कुलय् तयेगु धयागु चिन्ता जुइगु याः । चक्रपथ जःखः नं यक्व हे स्कुल दुसां नेवाः पह दुगु, नेवाः नुगः दुगु स्कुल धाःसा म्हो हे जक दु । अथे जूबलय् नकतिनिया नचापिं मस्तय्त गन स्कुलय् तयेगु धयागु चिन्ता जुइगु स्वाभाविक हे जुल ।
थज्याःगु चिन्ताय् भतिचा मन तये फइकथंया ज्या ग्वंगः बुँया लसना प्रि–स्कुलं यानाच्वंगु दु । झिंप्यदँ न्ह्यव हे चायेकूगु थ्व स्कुल नेवाः नुगः, नेवाः पहः दुपिंसं हे चायेकातःगु दु । अथे जूगुलिं थन स्कुलय् वःपिं मस्तय्त नं थः हे मस्त थें सुसाःकुसाः, बिचाः यानाः ब्वंकेगु जुयाच्वंगु दु ।
प्ले गु्रप निसें युकेजी ब्वंकीगु थ्व स्कुल थौंकन्हय्या आवश्यकता कथं अंग्रेजी माध्यमं हे ब्वंकीगु स्कुल खः । तर थन नेवाः भाय्यात नं प्राथमिकता बियातःगु दु । अथेहे प्रिन्सिपल निसें ब्वंकीपिं फुक्क धयाथें शिक्षक–शिक्षिकापिं नेवाःत हे दु । युकेजीइ नेवाः भाय्या छगू विषय नं ब्वंकेगु यानाच्वंगु दु ।
‘थ्व स्वयां नं मू खँ थन ब्वनीपिं मस्तय्त जिमिसं थः हे मस्त थें बिचाः याना । न्हि निक्वः स्कुलय् हे नकेगु व्यवस्था दु । मस्तय् म्हितेगु, द्यनेगु, नयेगु थाय् व्यवस्थित याना तयागु दु । छगू कक्षाय् नीम्हं अप्वः मतया’ प्रिन्सिपल दानशोभा तुलाधरं धयादी ।
ग्वंगःबुँ जःखःया अप्वः थें नेवाः मस्तय् थन हे ब्वनावंगु लुमंकादिसें वय्कलं धयादीगु दु, ‘थौंकन्हय् नेवाः मस्तय् वयेगु भचा म्हो जुयाच्वंगु दु, जःखःयापिं ला थन हे ब्वनाः मेथाय् स्कुलय् वनेधुंकूगु दु, भचा उखेथुखे च्वंपिंसं मसिया च्वंगु जुइफु ।’
‘स्कुलय् ब्वंकीपिं, स्वइपिं फुक्क धयाथें नेवाःत हे जूगुलिं थन मस्तय् बांलाक बिचाः याइ धकाः गैरनेवाः अभिभावकपिंसं थः मस्तय् थन तये हयाच्वंगु दु’ वय्कलं धयादी ।

युकेजीया मस्तय्त नेवाः भाय् नं ब्वंकाच्वनागु जूसां गैर नेवाःत नं लय् हे तायाच्वंगु दु । ‘वय्कःपिं नेवाः भाय् नं स्यने खन धकाः लय् हे ताः । दछि तक ब्वंकेबलय् गैरनेवाःतय्सं छुं छुं नेवाः खँग्वः बांलाक हे न्ववाइ’ वय्कलं धयादीगु दु ।
थ्व ला नेवाः भाय्प्रतिया मतिनां स्कुलं यानाच्वंगु ज्या जुल । मस्तय्त बीमाःगु शिक्षाया निंतिं स्कुलं बांलाक हे ध्यान बिया वयाच्वंगु खनेदु । व्यवाहारिक शिक्षा, मस्तय्त ल्वःममनीकथं ब्वंकेगु नं स्कुलया विशेषता खः । थुकिया निंतिं मस्तय्त छु बारे ब्वंके त्यनागु खः, फयांफतले व हे ज्वलं न्ह्यःने तयाः ब्वंकेगु याइ । गथेकि छुं सिसाबुसा बारे ब्वंकेमाल धाःसा उगु सिसाबुसा हे न्ह्यःने तयाः क्यनाः थुइकेगु याइ ।
मस्तय्त इलय् ब्यलय् चाःहिके यंकेगु ज्या याइ । मस्तय्गु निंतिं जक लैनचौरय् चायेकातःगु जापानिज लाइब्रेरी दँय्दसं हे मस्तय्त यंकाः क्यनेगु यानाच्वंगु दु । अथेहे थीथी धेंधेंबल्लाः, कासा नं जुया हे च्वनी ।
मस्तय्त नेवाः तजिलजिया बारे जानकारी बीगु निंतिं नखःचखःबलय् यःमरि, क्वाति, वः आदि नेवाः नसा नकेगु यानाच्वंगु दु ।
स्कुलं मस्त काःवनेगु तःवनेगु निंतिं गाडीया व्यवस्था नं यानातःगु दु । छुं दँ न्ह्यवतक किलाघः, न्यतं निसें थन मस्त ब्वंवइपिं दुगु खः । आः नं आवश्यक कथं गाडीया व्यवस्था दुगु खँ वय्कलं धयादी ।
स्कुलं वंगु श्रीपञ्चमी निसें प्लेगु्रप व नर्सरी कक्षाय् भर्ना चायेकेधुंकूगु दु । वइगु वैशाख तक हे भर्ना कायेगु खँ प्रिन्सिपल तुलाधरं धयादीगु दु ।