मंकाः खलःया दबूछेँ नं बालेन साहं दयेकूगु प्रचार

येँ (नेपालभाषा टाइम्स)- येँया दल्लुइ दयेकाच्वंगु नेपालभाषा मंकाः खलःया छेँ येँ मनपाया मेयर बालेन साहं दयेका बिउगु धकाः प्रचार शुरु याना हःगु दु । येँनं पिहां वइगु छगू अनलाइनं प्रशारण उगु गलत समाचार प्रेषित याःगु खः ।

मंकाः खलःया उगु छेँ वर्तमान मेयर बालेन साहं दयेकूगु मखुसें पूर्व मेयर विद्यासुन्दर शाक्यपाखें बजेट निकासा यानाः दयेकूगु खः । उगु छेँया शिलान्यास तकं पूर्व मेयर शाक्यं यानादीगु खः ।

येँनं प्रशारण जुइगु ‘हरपल’ नांगु छगू अनलाइनं उगु समाचार प्रशारण याःगु खः । समाचारया लागिं उगु अनलाइनं मंकाः खलःया छेँय् वनाः भिडियो नं शुटिङ यानातःगु दु । तर समाचार च्वयेत धाःसा मंकाः खलःया सुं नं पदाधिकारीयाके न्यनेकने तकं मयासे बालेन साहं थ्व छेँ दयेका बिउगुलिं येँ देय्या नेवाः समुदाय तसकं लय्ताः धकाः च्वयातःगु दु । समाचार च्वयातःगु शैली स्वयेबलय् थ्व गल्तीवस मखुसें मनपां नियतवस हे तयार यानाः भ्रम न्यंकेकथं प्रशारण याःगु खनेदु धाःगु दु ।

येँ मनपाया मेयर साहं थ्व स्वयां न्ह्यः नं पूर्व मेयर शाक्यया पालय् यानातःगु गुलिखे ज्या थम्हं यानागु धकाः गलत प्रचार याना जूगु खः । न्हापा हे सम्झौता जुयाः तयार जुयाच्वंगु हाइ मास मत तयेगु ज्या, १०२ एम्बुलेन्सपाखें निःशुल्क सेवा बीगु ज्या, नेपाल प्रहरीलिसे जानाः थाय्थासय् सिसी क्यामेरा तयेगु ज्या नं वर्तमान मेयर साहं थम्हं यानागु धकाः प्रचार याना जूगु खः ।

थौंकन्हय् येँया २२ वडास्थित धर्म पथय् येँ देय् सांस्कृतिक छेँ दनेगु ज्या नं आः अन्तिम चरणय् थ्यनाच्वंगु दु । पूर्व मेयर शाक्यया विशेष पहलय् निर्माण जूगु उगु छेँ तयार जुइबलय् व नं मेयर साहं हे दयेका बिउगु धकाः प्रचार जुइ फइगु खँ धयाहःगु दु ।