ने. सं. ११४४ कौलाथ्व चौथी -

कांग्रेस जिल्ला सभापतितय् थःगु हे दुःख

येँ (नेपालभाषा टाइम्स)- नेपाली कांग्रेसया जिल्ला सभापतितय्सं थःगु पार्टी सरकारय् दुसां सरकारलिसे थःपिनि छुं हे स्वापू मदयाच्वन धासें आलोचना याःगु दु ।
येँय् म्हिगः क्वचाःगु कांग्रेस सभापतितय् भेलां थज्याःगु गुनासो याःगु खः । देय्या फुक्कं जिल्लाया कांग्रेस सभापतितय् निन्हुयंकंया भेला सानेपाया पार्टी ज्याकुथिइ जूगु खः । भेलां सभापतितय् गुनासोया लिसें आः पार्टीं यायेमाःगु थीथी ज्याखँत तयाः १४ बुँदाया छगू प्रतिवद्धता पत्र नं पारित याःगु दु ।

भेलाय् न्ववाःपिं सभापतितय्सं सरकारया नेतृत्वं पार्टी नेतृत्वयात वास्ता मयाःगु, जिल्लालिसे सरकारया छुं हे स्वापू मदुगु, बजेट तयेगु खँय् भेदभाव याःगु, पार्टीया थीथी भ्रातृ संगठनतय्त पूर्णता बीगु इलय् जिल्ला समितितय्त वेवास्ता याःगु, गुटया राजनीति यायेगु थेंज्याःगु ज्याखँत जुयाच्वन धासें उकी नं नेतृत्वया ध्यानाकर्षण याःगु खः ।

भेलाय् सभापतितय्सं धाःगु खँयात पार्टीया नेतृत्वयाथाय् थ्यंका बीगु बचं निम्ह महामन्त्रीपिं गगन थापा व विश्व प्रकाश शर्मां बियादीगु खः । वय्कःपिंसं आः वइगु केन्द्रीय कार्यसमितिया बैठकय् थ्व खँ तयेगु बचं बियादीगु खः ।

सभापतितय्सं थौंकन्हय् पार्टी सुस्त जुयाच्वंगु खँय् नं नेतृत्वया ध्यानाकर्षण याःगु दु । नेपाली कांग्रेसं न्हापा न्हापा थें आः नियमित कार्यक्रम मतःगु लिसें संगठन विस्तारया ज्या नं याना मयंकू धासें जिल्ला सभापतितय्सं थःपिनि चिउताः प्वंकूगु खः ।

वय्कःपिंसं आः कांग्रेसयात न्हापा स्वयां बल्लाका यंकेमाःगु व उकिया लागिं पार्टीइ रुपान्तरण हयेमाःगु दु धकाः नं सुझाव बिउगु खः । ताःई लिपा कांग्रेस सभापतितय् थज्याःगु भेला च्वंगु खः ।