ने. सं. ११४६ बछलागा तृतीया -

चोलेन्द्र शम्शेरं राजीनामा मबिउसा न्यायाधीशतय्गु आन्दोलन

येँ- नेपाल बार एसोसिएसनया सल्लाहकार समितिया दुजःपिसं विवादय् लानाच्वंम्ह प्रधानन्यायाधीश चोलेन्द्र शम्शेर जबरायात तत्काल राजीनामा बीत सुझाव बिउगु दु । यदि वय्कलं राजीनामा मबिल धाःसा वय्कःया विरुद्ध आन्दोलनय् वने मालीगु ख्याच्वः नं बिउगु दु ।

म्हिगः च्वंगु बैठकय् ३७ म्ह दुजःपिं मध्ये ३६ म्हेस्यां प्रधानन्यायाधीश जबरां तत्काल राजीनामा मबिल धाःसा देय्न्यंकं आन्दोलन यायेमाःगु सुझाव बिउगु खः । बारया बैठक लिपा सञ्चारकर्मीत लिसे खँ ल्हासें वरिष्ठ अधिवक्ता टिकाराम भट्टराईं धयादिल, ‘सल्लाहकार समिति सहितया बैठकय् ३७ म्ह मध्ये ३६ म्हेस्यां राजीनामा फ्वनेमाः धाःगु दु, प्रधानन्यायाधीश जबरां अबिलम्ब राजीनामा यायेमाःगु सुझाव वःगु दु, आः कार्यसमिति च्वनाः निर्णय याइ व नेपाल बारया उगु सुझावया आधारय् अबिलम्ब राजीनामा मबिल धाःसा देय्न्यंकं आन्दोलन जुइ ।’

उकथं हे मेम्ह वरिष्ठ अधिवक्ता रमण श्रेष्ठं प्रधानन्यायाधीशं राजीनामा मबिल धाःसा मेगु ज्याझ्वः क्वःछीमाःगु खँ धयादीगु दु । वय्कलं थौंया दुने आन्दोलनया ज्याझ्वः वइ धासें धयादिल, ‘सल्लाहकार समितिया बैठक सःतेधुंकाः प्रधानन्यायाधीश उकथं च्वना च्वने मजिउगु खः, वय्कलं पद त्वःतेमाःगु खः, राजीनामा बीमाः धइगु खँय् फुक्कं सहमत जूगु दु ।’

वय्कलं न्हापांगु चरणया आन्दोलन सर्वोच्च अदालतय् जक यायेगु खः कि देय्न्यंकं यायेगु धइगु बारे सहलह जुयाच्वंगु धासें सल्लाहकारतय् बैठक लिपा नेपाल बारं आन्दोलनया बारे क्वःछीगु खँ धयादिल ।

उकथं हे वरिष्ठ अधिवक्ता शम्भु थापां थनिंनिसें कानुन व्यवसायीतय्सं सर्वोच्च अदालतय् बहस मयायेगु खँ धयादीगु दु । वय्कलं प्रधानन्यायाधीश जबरां राजीनामा बीमाःगु व जबरां याःगु गलत ज्यायात कयाः छानविन समेत यायेमाः धयागु माग थःपिनिगु दुगु खँ नं धयादिल । लिसे वय्कलं प्रधानन्यायाधीश जबरा पदय् दत्तले सर्वोच्च अदालतय् बहस बहिष्कार यायेगु खँ नं धयादीगु दु ।
वरिष्ठ अधिवक्ता थापां न्यायाधीश हरिकृष्ण कार्कीया प्रतिवेदनं न्यायालयय् बिचौलिया दुगु खँ ल्ह्यथनातःगु धासें उकियात कार्यान्वयन मयासे पनेगु ज्या नं स्वयम् प्रधानन्यायाधीश जबरां यानादीगु द्वपं नं बियादीगु दु ।

थ्वहे झ्वलय् सर्वोच्च अदालतया झिंन्याम्ह न्यायाधीशतय्सं प्रधान न्यायाधीश जबरां लँपु चायेकेत राजीनामा बीमाःगु निष्कर्ष पिकाःगु दु । म्हिगः प्रधानन्यायाधीश लिसे सहलह यायेधुंकाः न्यायाधीशपिनि दथुइ च्वंगु बैठकं उगु निष्कर्ष पिकाःगु खः । लिसें न्यायाधीशपिंसं प्रधानन्यायाधीश जबरां न्यायपालिकाया नेतृत्व यायेमफुगु खँ नं धाःगु दु ।

थ्वहे झ्वलय् प्रधानन्यायाधीश जबरां न्यायाधीशतलिसे सहलह यायेगु झ्वलय् थः संवैधानिक लँपुं वयाम्ह जूगुलिं संवैधानिक ल्याखं हे पिहां वनेगु खँ धयादीगु सीदुगु दु । प्रधानन्यायाधीश जबरां विवाद व न्ह्यसःचिं ब्वलंपिं न्यायाधीशत फुकस्यां राजीनामा बीगु खःसा थः नं राजीनामा बीत तयार दुगु खँ धयादीगु खः । प्रधानन्यायाधीशया बारे सहलह यायेत थौं नं न्यायाधीशपिनि दथुइ मंकाः सहलह जुइगु जूगु दु ।

प्रधानन्यायाधीशया विवादया कारणं म्हिगः नं सर्वोच्च अदालतया इजलास प्रभावित जूगु दु । सोमवाः नं न्यायाधीशपिं इजलासय् मच्वँसे मंकाः सहलह याःगु खः । म्हिगः प्रधानन्यायाधीश जबरां १५ म्ह न्यायाधीशया च्यागू इजलास क्वःछिउगु व उकी मध्ये न्हय्गू मंकाः इजलास क्वःछिउगु खःसा नहकूल सुवेदीयात एकल इजलास क्वःछिउगु खः ।