बागमतीपाखें बाजं न्यायेत स्वंगू करोड

येँ -स्वनिगःया मौलिक संगीत संस्कृति ल्यंका तयेगु लागिं बागमती प्रदेश सरकारं थुगु दँय् जक स्वंगू करोड तका दां विनियोजन याःगु खँ धाःगु दु । स्वनिगःया थीथी गुथि व त्वाःया लागिं बाजं न्याना बीगु लागिं बागमती प्रदेश सरकारं स्वंगू करोड तका बजेट फ्याःगु खः ।

म्हिगः थनया २१ वडास्थित तःबहाःया पिने च्वंगु तुंफः व अन च्वंपिं तःत पुनस्र्थापना यायेगु ज्याझ्वलय् न्ववासें येँ महानगरपालिकाया प्रमुख विद्यासुन्दर शाक्यं उगु खँ कनादीगु खः ।

राजधानी येँ देय्या कला व संस्कृति संरक्षण यायेगु लागिं येँ महानगरपालिकां यानाच्वंगु ज्याखँय् आः प्रदेश सरकार नं स्वाःवःगु खँय् लसता प्वंकुसें वय्कलं उकिया लागिं पहल यानादीम्ह प्रदेश सांसद डा. अजयक्रान्ति शाक्य लगायत मेपिं सांसदतपिंत सुभाय् नं देछायादिल ।

येँया २१ वडास्थित कीर्तिपुण्य वज्रधातु महाविहार तःबहालय् थापना जुयाच्वंगु गणेद्यः, मांकाद्यः, सुसुद्यः व तुंफः जीर्णोद्धार ज्या क्वचाःगु लसताय् म्हिगः येँ मनपा प्रमुख शाक्यपाखें उलेज्या जूगु खः । स्थानीय तःबहाः पुचः व येँ मनपा २१ वडा ज्याकूया ग्वाहालिइ उगु जीर्णोद्धार ज्या याःगु खः । उगु थासय् पुलांपिं हे द्यःपिंत सुरक्षित जुइक पलिस्था यानाः फः बांलाकेगु ज्या जूगु खः ।

सम्बन्धित बुखँ

LEAVE YOUR COMMENTS