स्कुल सञ्चालन छु यायेगु ?

येँ -भारतय् कोरोना संक्रमण अप्वया वयेवं नेपालय् स्वास्थ्य मन्त्रालय व गृह मन्त्रालयं अलग अलग वक्तव्य पिकयाः सतर्कता नालेत सार्वजनिक आह्वान यायेवं आः शिक्षा मन्त्रालयं नं सक्रिय जुसें सतर्क जुइत आह्वान याना हःगु दु । खास यानाः नकतिनि चायेकेगु शुरु याना हःगु स्कुलतय्त आः छु यायेगु धइगु न्ह्यसः पिहां वयेवं शिक्षा मन्त्रालयं नं म्हिगः बैठक च्वनाः थुकिया बारे मापदण्ड तयार यायेगु ज्या शुरु याःगु खः ।

म्हिगः शिक्षा, विज्ञान तथा प्रविधि मन्त्रालयय् च्वंगु मुँज्यां आःया इलय् शैक्षिक सतर्कता अपने यायेमाःगु खँय् बिचाः यायेमाःगु बारे सहलह ब्याकूगु खः । म्हिगः शिक्षा मन्त्री कृष्णगोपाल श्रेष्ठया अध्यक्षताय् उगु मुँज्या च्वंगु खः । बैठकं केन्द्र सरकार नापं प्रदेश व स्थानीय सरकारतय्सं गज्याःगु सतर्कता नियम पालना यायेमाःगु खः उकिया बारे नापं सहलह ब्याकूगु खः ।

वर्तमान अवस्थायात ध्यानय् तयाः आः स्वास्थ्य सम्बन्धी सतर्कता नालाः जक शिक्षण सम्बन्धी गतिविधि न्ह्याके माःगु खँ नं न्ह्यःने वःगु दु । गृह मन्त्रालयं आः यक्व हुल मुनेगु व भीडभाड यायेगु ज्या बन्द याके माली धकाः निर्देशन बिया हःगु कारणं स्कुलय् आः छु यायेगु धइगु न्ह्यसः पिहां वःगु खः । ताः ई तक बन्द जुयाच्वंगु स्कुलत नकतिनि चायेकूगु कारणं आः हानं स्कुल बन्द यायेबलय् पढाई प्रभावित जुइगु चिन्ता जुयाच्वंगु दु ।

मेखे गृह व स्वास्थ्य मन्त्रालयया सुचं सार्वजनिक जुइवं स्कुलय् मस्त आखः ब्वनाच्वंपिं अभिभावकत नं चिन्तित जुया वःगु दु । अभिभावकतय्सं स्कुलय् फोन यानाः मस्तय् बारे छु यायेगु धकाः न्यना हयाच्वंगु दु । थ्वहे झ्वलय् येँ महानगरपालिकाया शिक्षा विभागं नं थुकिया बारे सहलह यायेगु तयारी यानाच्वंगु खँ सीदुगु दु ।

यदि स्थिति चिन्ताजनक जुया वन धाःसा आःयात जोर बिजोर यानाः कक्षा सञ्चालन यायेमालीगु बारे विभागय् खँल्हाबल्हा जुयाच्वंगु खँ सूत्रं धाःगु दु । अथे धइगु छन्हु १, ३, ५, ७ व ९ कक्षा सञ्चालन यायेगु खःसा मेगु न्हि २, ४, ६, ८ व १० कक्षा सञ्चालन यायेगु योजना खः । अथे यायेबलय् स्कुलय् भीडभाड कम जुइगु व स्कुल नं सञ्चालन जुइगु योजना खः ।

शिक्षा विभागय् थुकिया बारे चर्चा जूसां छुं निर्णय धाःसा जूगु मदुनि । सूत्रतय् कथं शिक्षा विभागं थ्व प्रस्ताव आः महानगरपालिकाय् तयेगु बारे नं बिचाः यानाच्वंगु दु । छुं जुयाः कोरोनाया कारणं नियन्त्रण यायेमाःगु अवस्था वल धाःसा शैक्षिक सत्र हानं प्रभावित जुइगु अवस्था वयेफुगु खँ नं धाःगु दु । शिक्षण सम्बन्धी संस्थातय् दथुइ नं थुकिया बारे खँ जुयाच्वंगु दु ।

सम्बन्धित बुखँ

LEAVE YOUR COMMENTS