ने. सं. ११४६ चाैलागा त्रयोदशी - थिमि बालकुमारी जात्रा

कवि वैद्या अन्त्यष्टि जुल

येँ – नेपालभाषा आधुनिक कविताया न्ह्यलुवा कवि पूर्ण वैद्य मंत । यलया निदान अस्पतालय् वासः याकु याकुं म्हीग बहनी वयकः मदुगु खः । कवि वैद्य वंगु गुंपुन्हि कुन्हु तिनि ८१ दँय् क्यंगु खः ।

म्हिगः नेपाली सेनापाखें वय्कःया सीम्ह व्यवस्थापन यासें पशुपतिया विद्युतीय शवदाह गृहय् अन्तिम संस्कार यात । व स्वयां न्ह्यः पशुपतिइ विराट नेपालभाषा साहित्य सम्मेलन गुथिपाखें वय्कःया किपा तयाः अन्तिम श्रद्धांजलि देछाःगु खः । उकी त्रिरत्न शाक्य, प्रतिसरा साय्मि, शाक्य सुरेन आदिपिंसं नुगःखँ प्वंकादीगु खः ।

वंगु वालय् कब्जियत जुयाः कवि वैद्ययात निदान अस्पताल भर्ना याःगु खःसा अन कोरोना पोजिटिभ खने दयेवं वय्कःयात भेन्टिलेटरय् तयाः वासः यायेमाःगु खः । चिकित्सकतय्सं धाः कथं वय्कःयाके अक्सिजन मात्रा म्हो जुजुं वनाः न्ह्यपुइ तक अक्सिजन थ्यंकेत समस्या जूगु खः । न्ह्यपुइ अक्सिजनया मात्रा थ्यंकेगु सुधार मजुयाः वय्कः मदुगु खँ धाःगु दु । मदुम्ह कवि वैद्यया छम्ह जहान जक दी ।

कवि वैद्यं नेपालभाषा काव्य ख्यलय् शैलीगत रुपं आधुनिक कविता शुरु यानादीगु श्रय बियातःगु दु । वय्कःया न्हापांगु कविता सफू ‘सरासु’ यात ने.सं. १०८४ या श्रेष्ठ सिरपाः लल्हाःगु खः ।

वय्कःया ‘लः लः खः’ कविता मुना नेपालभाषा जक मखुसें खस नेपाली भाषाया साहित्यिक ख्यलय् तकं अतिकं चर्चित कृति खः । थ्व कृति अंग्रेजी भासं अनुवाद जुयाः ‘ड्रप अफ वाटर’ नामं पिहां वयेधुंकूगु दु ।

कवि वैद्यं कविता बाहेक आत्मपरक निबन्ध ख्यलय् नं उतिकं हे गहन सिर्जना यानादीगु दु । वय्कःया निबन्ध संग्रह ‘जि छगू अभिव्यक्ति युगया’ यात ने.सं. ११०१ या श्रेष्ठ सिरपाः लाःगु खः । वय्कःया ‘कविताया लागा’ नांगु साहित्यिक च्वसु मुना सफू नं पिहां वःगु दु । वय्कलं जापानी कवि सुन्तारो कानिकावाया कविता नं नेपालभाषां अनुवाद यानाः पिथनादीगु खः ।

कवि वैद्ययात मातृभाषा प्रज्ञा पुरस्कार, राष्ट्रिय प्रतिभा पुरस्कार, अस्वीकृत विचार पुरस्कार, साहित्य सन्ध्या पुरस्कार, ठाकुरलाल निबन्ध सिरपाः, नेवाः हना सिरपाः आदि थीथी सिरपालं सम्मान यानातःगु दु ।