शितला मा.वि.इ दकलय् न्हापांगु कोड क्लब
येँ(नेपालभाषा टाइम्स)-येँ महानगरपालिका १६ वडा ल्हुतिस्थित शितला माध्यमिक विद्यालयय् देय्या हे न्हापांगु ‘कोड क्लब’या स्थापना याःगु दु । येँ महानगरपालिकाया उपप्रमुख सुनिता डंगोलं वंगु शुक्रवाः छगू ज्याझ्वःया दथुइ विद्यालयय् स्थापना याःगु कोड क्लबया उलेज्या यानादीगु खः ।
उगु इलय् उपप्रमुख डंगोललिसें शिक्षा विभाग प्रमुख सिताराम कोइराला, शिक्षा सल्लाहकार रेशु ढुंगाना अर्याल, आइटी विज्ञ सगुन ढुंगाना लगायतया पुचलं विद्यालयया बुक फ्रि फ्राइडे, शिक्षाय् सीप विकास अन्तर्गत ब्युटिसियन व हेयर स्टाइल, नियमित रुपं कक्षाय् जुयाच्वंगु ह्याण्डस अन अन्तर्गत थीथी गतिविधि व क्रियाकलापया अनुगमन नं यानादीगु खः । विद्यालयय् स्काउट, नेपालभाषा संगीत, किपा च्वज्या थेंज्याःगु सीप तालिम लगायतया विषयय् स्यनेकने जुयाच्वंगु दु ।
विद्यालयया प्रधानाध्यापक लक्ष्मण श्रेष्ठं वय्कःपिं विद्यालयय् जुनियर रेडक्रस सर्कल (जुरेस), इको क्लब, जर्नल प्रकाशनक्लब, डीआरआर क्लब, स्काउट कोड क्लब, बालक्लब, डिबेट क्लब लगायत थीथी झिगू क्लब संचालन जुयाच्वंगुनापं उकिया गतिविधिया बारे नं जानकारी बियादीगु खः ।
व्यवस्थापन समितिया अध्यक्ष शुक्रलाल श्रेष्ठं विद्यालयय् गठन यानातःगु दक्वं क्लब सक्रिय दुगु व ‘शिक्षाय् सीप’ ज्याझ्वः अन्तर्गत सौन्दर्य कला व हेयर स्टाइल सम्बन्धी तालिमय् विद्यालयया मिसा व मिजं विद्यार्थीया उतिकं सहभागिता दुगु जानकारी बियादिल ।
कोड क्लबया विद्यार्थीतय्सं खुल्ला चौर वा ख्यलय् म्हितीगु फुटबल, बास्केटबल, भलिबल थेंज्याःगु कासा म्हिताः न्ह्यइपुक कम्प्युटरय् न्हूगु कासा दयेके फइ । थुकिया लिधंसा धइगु स्क्राय्च कोडिङ खः । थुकथं निर्माण याःगु ज्याझ्वःत १६० गू देय्या विद्याथीतय् नेटवर्कय् थ्यनी । अले थ्व प्लेट फार्मपाखें अन्तर्राष्ट्रियस्तरय् तकं धेंधेंबल्लाः याये फइ ।
झिंप्यंगू विद्यालयय् शुरु यायेत्यंगु कोड क्लब महानगरपालिका दुनेया दक्वं सार्वजनिक विद्यालयय् स्थापना यायेगु तयारी जुयाच्वंगु दु । उगु क्लबपाखें ब्वँमिपिंसं कोडिङ, एनिमेसन, सामान्य प्रोग्रामिङलिसें वेबसाइट व थीथी कथंया एप्लिकेशन (एप्स) दयेकेगु क्रियाकलाप बारे सयेक सीके याये फइ ।
डिजिटल शिक्षा परिदृश्य उत्थान यायेत व ब्वँमि व स्यनामिपिंत न्हू न्हूगुकथंया प्राविधिक उपकरणलिसे सशक्त याना यंकेगु विचाःकथं महानगरपालिकां ‘डिजिटल एण्ड बियोन्ड’लिसे सहकार्य यानाः प्रत्येक सामुदायिक ब्वनेकुथिइ च्बकउदभचचथ–एष् ँयगलमबतष्यल ऋयमभ ऋगिद गठन यायेगु शुरु याःगु विद्यालयया प्रधानाध्यापक श्रेष्ठं कनादिल ।
आइटी विज्ञ ढुंगानायाकथं तगिं ४ निसें तगिं ९ तकया विद्यार्थीतय्त उमेर समूहय् तयाः कोडिङ सम्बन्धी ज्याझ्वः संचालन यायेगु व थुकथंया ज्याझ्वलं ब्वनामितय् सीप, शैक्षिक व सोचयालिसें आलोचनात्मक विचारया विकासय् नं ग्वाहालि जू वनीगु विश्वास याःगु दु ।
येँ महानगरपालिका व शितला माध्यमिक विद्यालयया सहकार्यय् विद्यालयया थःगु हे वेबसाइट निर्माण सम्पन्न यानाः कन्टेन्ट म्यानेमेन्टया ज्या नं जुयाच्वंगु दु । थुकिं सामुदायिक विद्यालयं थःगु म्हसीका विश्वया न्ह्यःने थ्यंकेत ग्वाहालि जुइ ।
उपप्रमुख डंगोलं शितला माध्यमिक विद्यालयं याःगु थुकथंया प्रगतिपाखें थः अतिकं लय्ताःगु व विद्यालयया निंतिं सकतांकथंया ग्वाहालि यायेत तयार दु धयादिल । वय्कलं शिक्षा व स्वास्थ्यया आमूल परिवर्तनय् महानगरपालिका महत्वकांक्षी ज्याझ्वःलिसें न्ह्याः वनाच्वंगुलिं सकसिगु साथ व ग्वाहालिया आवश्यकता दुगु नं धयादिल ।
LEAVE YOUR COMMENTS