हाम्रो जात्राया श्याम था सम्मानित

थिमि(नेपालभाषा टाइम्स)- हाम्रो जात्राया प्रोपाइटरलिसें संचालक संस्कृतिकर्मी श्याम था श्रेष्ठ सम्मानित जुयादीगु दु । बाबा बचत तथा ऋण सहकारी संस्था लि.या १९ क्वःगु वार्षिक साधारणसभामा संस्कृतिकर्मी श्रेष्ठयात सम्मान याःगु खः ।

मध्यपुर थिमि नगरपालिका ४ शंखधरचोक बायरिलाँ मार्गय् च्वंग सहकारी संस्थां हाम्रो जात्रापाखें नेवाःतय् थीथी जात्रा, पर्व, नखःचखः संस्कृतिया प्रवद्र्धन, संवद्र्धन, प्रचार प्रसार यायेगु ज्याय् ज्वःमदुगु भूमिका म्हितूगु धासें नगद झिद्वः तका दांलिसें दोसल्ला न्ययेकाः हनापौ देछासे सम्मान याःगु खः ।

सामाजिक संजाल फेसबुकय् ‘हाम्रो जात्रा’ नांया ग्रुपपाखें श्याम था श्रेष्ठं स्वनिगःया येँ, यल, ख्वप स्वनिगलं पिने द्वाल्खा, मकवानपुर, सिन्धुपाल्चोक, काभ्रेपलाञ्चोकलिसें थीथी जिल्लाय् जुइगु स्थानीय मौलिक जात्रा, प्याखं, संस्कृतिया प्रत्यक्ष प्रशारण यायेगु याना वयाच्वनादीगु दु । वय्कःय हाम्रो जात्रा नेपालय् जक मखसे विदेशय् तकं उतिकं लोकंह्वाः ।

संस्थाया अध्यक्ष ज्ञानराम श्रेष्ठया सभापतित्वय् जूगु साधारणसभाया उलेज्या मध्यपुर थिमि नगरपालिकाया प्रमुख सुरेन्द्र श्रेष्ठं यानादीगु खः । नगर प्रमुख श्रेष्ठं संस्कृतिकर्मी श्रेष्ठयात भिंतुना बियादिसें मध्यपुर थिमिया जक मखसे देय्या थीथी मूर्त, अमूर्त, कला, संस्कृति, जात्रा, प्याखं आदि फेसबुक पेजया माध्यमं प्रत्यक्ष प्रशारण यानाः उकिया जानकारी बीगु ज्या धासें हे च्वछायेबहजू धयादिल । लिसें वय्कलं वइगु पुस १२ निसें १४ गते तक मध्यपुर महोत्सव जुइत्यंगु नं जानकारी बियादिल ।

संस्थाया अध्यक्ष श्रेष्ठं संस्था थुगुसी संस्कृतिकर्मी श्याम थालिसें शेयर सदस्यतय् स्नातकोत्तर व विद्यावारिधी यानादीपिं कायम्ह्याय् यानाः झिंस्वम्हेसित नगदसहित सम्मान यानागु जानकारी बियादिल ।
संस्थाया सचिव ज्ञानहरि श्रेष्ठं वार्षिक प्रगति प्रतिवेदन न्ह्यब्वयादीगु खःसा कोषाध्यक्ष प्रेमरत्न मानन्धरं आर्थिक दँ ०८०÷८१या आर्थिक विवरण व लेखा समितिया संयोजक अलिशा श्रेष्ठं लेखा सुपरीवेक्षण समितिया प्रतिवेदन न्ह्यब्वयादीगु खः ।

साधारणसभां संस्थाया न्हूगु संचालक समितिया नं ल्यज्या याःगु खः । प्यदँया कार्यकालया न्हूगु संचालक समितिइ उमेश श्रेष्ठ अध्यक्ष, दीपम श्रेष्ठ उपाध्यक्ष, ज्ञानहरि श्रेष्ठ सचिव, प्रेमरत्न मानन्धर कोषाध्यक्षय् ल्यःगु दु । अथे हे संचालक समितिया दुजलय् नविन प्रकाश श्रेष्ठ, दीपक श्रेष्ठ, तुल्सीमैया श्रेष्ठयात ल्यःगु दुसा लेखा समितिया संयोजक ज्ञानराम श्रेष्ठ, दुजलय् तुल्सीकृष्ण श्रेष्ठ व राजेश श्रेष्ठ च्वनादीगु दु ।