येँ महानगरन्यंकं ८ तगिंया नेपालभाषा परीक्षा

येँ (नेपालभाषा टाइम्स)- येँ महानगरपालिकापाखें लागू याःगु नेपालभाषा विषयय् म्हिगः महानगरन्यंकं छन्हुं हे ८ तगिमय् जाँच कायेगु ज्या जुल । येँ मनपा दुने लाःगु करिब ६०० गू संगठित (निजी) व ९६ गू सामुदायिक (सरकारी) स्कुलया तगिं ८ य् म्हिगः मनपाया शिक्षा विभागं हे जाँच काःगु खः ।

येँ महानगरन्यंकं ८ तगिंया फुक्कं विषयया जाँच मनपाया शिक्षा कार्यालयपाखें काइगु खः । थुकिया लागिं न्ह्यसःपौ तयार यायेगुनिसें लिच्वः पित बीगु ज्या तकं शिक्षा कार्यालयं याइ । अथे खःसां नेपालभाषा छगू विषयया जाँच धाःसा सम्बन्धित स्कुलतय्सं हे थःथः कथं कायेगु याना वयाच्वंगु खः । तर म्हिगः धाःसा नेपालभाषाया न्ह्यसःपौ नं शिक्षा कार्यालयं हे तयार यानाः स्कुल स्कुलय् छ्वःगु खः । आः थुकिया लिच्वः नं शिक्षा कार्यालयं हे सार्वजनिक याइ ।

म्हिगः शिक्षा कार्यालयपाखें नेपालभाषा विषयया जाँच जुयाच्वंगु निजी स्कुलय् अनुगमन याकेगु ज्या नं जूगु खः । निजी स्कुलतय्सं नेपालभाषाया जाँच कयाच्वंगु दु वा मदु, मेगु विषयया जाँच कयाः नं नेपालभाषा च्वकेगु यानाच्वंगु खः ला धकाः सीकेत उगु अनुगमन याकेगु ज्या जूगु खः ।

अनुगमन जूगु फुक्क धइथें स्कुलय् नेपालभाषाया जाँच विधिपूर्वक कयाच्वंगु लूगु खँ धाःगु दु । गुलिखे स्कुलय् शिक्षक मदयाः नेपालभाषाया कक्षा मजूगु खःसां जाँचया इलय् धाःसा विशेष कक्षा कयाः जूसां तयारी यानाः जाँच काःगु नं लूगु दु ।

गुलिं स्कुलय् अनुगमनकर्तातलिसे खँ ल्हासें जाँच बियाच्वंपिं ८ तगिंया विद्यार्थीतय्सं न्ह्यसःपौ खास थाकु मजूगु व थःपिंसं याउँक लिसः च्वयेफु धकाः प्रतिक्रिया बिउगु खँ नं सीदुगु दु ।