धर्मपथय् आः पार्किङ भवन
कामपाया खाली जग्गाय् गाडी पार्किङ याइगु छेँ दयेकीगु
येँ – यँे देशय् अप्वयावं वनाच्वंगु सवारी चाप र पार्किङ समस्यायात ध्यानय् तयाः आः येँ महानगरपालिकां नगरया नुगःचु थेंज्याःगु थासय् लानाच्वंगु न्हूसतकय् तजाःगु पार्किङ भवन दयेकीगु जूगु दु । येँ मनपा वडा नं. २२ या धर्मपथस्थित महानगरपालिकाया पुलांगु ज्याकू दुगु छेँया खालीगु जग्गाय् आः उगु पार्किङ भवन दयेकेगु तयारी जूगु खः ।
छुं ई न्ह्यवंनिसें हे उगु खालीगु जग्गाय् पार्किङ भवन दयेकेगु चर्चा जुयाच्वंगु खः । आः येँ मनपां पार्किङ भवन दयेकेत प्रस्ताव आह्वान समेत यायेधुंकूगु दु । मनपां उगु भवनया डिजाइन, लगानी, निर्माण, सञ्चालन व हस्तान्तरण (डीएफबीओटी) मोडालिटीइ दयेकेगु योजना सहित एक्स्प्रेसन अफ इन्ट्रेष्ट (ईओआई) पेश यायेत आह्वान याःगु खः ।
थुकी गुगुं नं इच्छुक स्वदेशी व विदेशी निजी कम्पनीं थःगु योजना सहित प्रस्ताव तये फइगु खँ धाःगु दु । येँ मनपां धाः कथं उगु पार्किङ भवनय् ५०० गः गाडी पार्क याये फइगु क्षमता दइ । पार्किङ भवनय् पार्किङ सेन्सर, अटोमेटिक टिकट काउन्टर, कार्डं ध्यबा पुलेगु व्यवस्था जुइ । पार्क याना तःगु फुक्कं सवारी साधनयात सीसी टिभीपाखें प्रत्यक्ष निगरानी यानाच्वंगु दइ ।
पार्किङ भवन दुने हे गाडी सिलेगु व सामान्य मर्मतया सुविधा समेत दइ । लिसें विद्युतीय सवारी साधनया लागिं कार चार्जिंगया व्यवस्था नं दइ । पार्किङ भवनया लागिं प्रस्तावित खाली जग्गाया क्षेत्रफल १ रोपनी १० आना दु । भवन निर्माण यायेबलय् कुल क्षेत्रफलया ३० प्रतिशत लागाय् क्यबचा दइसा कुल क्षेत्रफलया २५ प्रतिशत लागा विज्ञापनया लागिं छ्यले फइ ।
न्हय्तँजाः दइगु उगु पार्किङ भवन पूर्ण रुपं अत्यानुधिक प्रविधियुक्त जुइ । येँ महानगरपालिकाया उगु खाली जग्गाय् महानगरया थःगु हे ज्याकू भवन दयेकेगु कि शपिंग कम्प्लेक्स दयेकेगु धइगु बारे नं चर्चा जूगु खः ।
तर येँया अतिकं व्यस्त व दकलय् अप्वः सपिंग कम्प्लेक्सत दुगु न्हू सतकया उगु व्यावसायिक क्षेत्रय् महानगरपालिकां मेगु कम्प्लेक्स थपे यायेगु पलेसा पूरा क्षेत्रयात हे ग्वाहालि जुइ कथं पार्किङ भवन दयेकूसा बांलाइ धकाः स्थानीय व्यवसायी, क्लब व संघ संस्थातय्सं नं सुझाव बिउगुलिं उकियात हे सम्बोधन यायेत नं येँ मनपां थ्व निर्णय याःगु खः ।
LEAVE YOUR COMMENTS